Mikailo Mudrik është vënë në epiqendër të vëmendjes në Angli, pasi iu bë e ditur sot se ai ka rezultuar pozitiv në një test anti-doping për një substancë të palejuar. Sipas “Daily Mail”, ai është pozitiv ndaj “meldonium”, një substance e cila është e ndaluar në Angli dhe për më tepër, ishte krijuar për ushtarët dhe jo për atletët.
Substanca në fjalë ra në sy pasi ishte përdorur në vitin 2016 nga tenistja e famshme ruse Maria Sharapova, gjë që solli edhe pezullimin e saj për dy vite dhe largimin nga sporti. Shkencëtari letonez i cili e krijoi këtë ilaç që rrit performancën fizike, Ivar Kalvins, theksoi se ajo nuk duhej të përdorej nga atletët, pasi ishte krijuar për “superushtarët sovjetikë”.
“Nëse ushtarët do të vepronin në male, atëherë ka mungesë oksigjeni. Mënyra për t’u mbrojtur nga dëmet, është duke përdorur Mildronate”, tha ai duke shpjeguar përdorimin e ilaçit që ka substancën e ndaluar, i cili sipas tij, ishte përdorur rregullisht në ushtrinë ruse.
Sipas mediave britanike, ekziston ideja se Mudrik është ekspozuar ndaj substancës në fjalë jashtë Anglisë, pasi ilaçi nuk lejohet të tregtohet në Britaninë e Madhe. Të gjitha dyshimet janë rreth grumbullimit të tij me Ukrainën, për ndeshjet e Ligës së Kombeve, ku ai luajti titullar përballë Gjeorgjisë dhe Shqipërisë, duke siguruar rezultatet që ngjitën ekipin e tij në vendin e dytë në grup.
