Kreu i Nismës Thurje, Endri Shabani, dhe ai i Lëvizjes Bashkë, Arlind Qori, kanë ndarë qëndrimet e partive të tyre dhe arsyet pse qytetarët duhet t’i mbështesin në zgjedhjet e ardhshme.
Arlind Qori theksoi se një nga elementet që e veçon Lëvizjen Bashkë është ndershmëria politike, e cila, sipas tij, njihet dhe pranohet edhe nga rivalët e partisë.
“Na e pranojnë ndershmërinë politike, është e rrallë,” tha Qori. Ai shtoi se një tjetër karakteristikë e Lëvizjes Bashkë është guximi politik, i provuar dhe fizikisht, përballë qeverisë dhe oligarkëve. Qori theksoi se partia e tij është anti-klienteliste, duke siguruar se nuk premtojnë vende pune, tendera apo PPP për askënd.
Nga ana tjetër, Endri Shabani theksoi se diferenca midis fjalëve dhe veprave është e madhe. Ai u shpreh se është shumë më e lehtë të flasësh në televizor sesa të marrësh veprime konkrete për të dërguar në burg të korruptuarit, duke iu referuar denoncimeve të Nismës Thurje në SPAK.
“Ne po konkurrojmë për të marrë më shumë pushtet politik,” tha Shabani, duke nënvizuar se Shqipëria ka arritur këtu ku është për shkak të monopoleve që e pengojnë shoqërinë të kontribuojë siç duhet. Ai kërkoi distancimin nga sulmet personale, duke i kujtuar këto praktika si një model të Sali Berishës gjatë 34 viteve.
Shabani theksoi se ajo që i bashkon janë më shumë se gjërat që i ndajnë, duke u angazhuar për një brez që mund të sjellë ndryshime të thella dhe pozitive për vendin.
