Elseid Hysaj shpreson që në pjesën e dytë të sezonit të luajë rregullisht dhe për të ka tashmë një ofertë zyrtare që mund ta shpëtojë nga situata te Lacio ku ai është lënë jashtë listave zyrtare të kampionatit dhe Europës.
Klubi i Leçes ka shfaqur interes të afrojë mbrojtësin, duke e huazuar si fillim për pjesën e dytë të sezonit, pasi trajneri Xhampaolo e sheh si një lojtar që me eksperiencën e tij mund t’i bëjë shumë punë kësaj skuadre. Por nga ana tjetër, ka nëj pengesë për realizimin e këtij transferimi.
Mediat italiane bëjnë të ditur se Lacio është gati ta japë falas Hysajn në janar në formë huazimi, por e gjithë rroga e lojtarit duhet të përballohet nga klubi i ri, sa i përket muajve të huazimit. Kjo do të thotë, se Lacio kërkon që deri në qershor, rroga e Hysajt të paguhet nga Leçe dhe shifra nuk është e vogël.
Duke llogaritur se Hysaj përfiton 2,8 milionë euro në sezon, për Leçen do të duhej të paguante 1,4 milionë euro të pagës së lojtarit dhe klubi në fjalë, nuk paguan aq as titullarët që ka për të gjithë sezonin. Ndaj në këtë pikë nuk ka një akord mes palëve, pasi Lacio nuk dëshiron të paguajë për një lojtar që luan në një klub tjetër, edhe pse kjo do të thotë që mund ta paguajë atë që të vazhdojë të qëndrojë në tribunë.
