Pesë persona kanë rënë në prangat e policisë së Tiranës, pasi akuzohen për vepra të ndryshme penale. Arrestimi i tyre u krye në kuadër të operacionit policor të koduar “Catch 5”.
NJOFTIMI
Finalizohet operacioni policor i koduar “Catch 5”, si rezultat i kontrolleve dhe punës së inteligjencës policore, për kapjen e shtetasve të shpallur në kërkim.
Lokalizohen dhe vihen në pranga 5 shtetas, të kërkuar për vepra të ndryshme penale. Konkretisht:
-shërbimet e Komisariatit të Policisë Nr. 2 kapën dhe ndaluan shtetasit e shpallur në kërkim, për veprën penale “Plagosja e rëndë me dashje”, A. D., 45 vjeç dhe B. D., 70 vjeç, babë e bir. Prokuroria e Tiranës ka urdhëruar ndalimin e tyre, pasi më 09.01.2025, në rrugën “Ndre Mjeda”, dyshohet se për motive të dobëta, janë konfliktuar me shtetasin D. M., 45 vjeç. Ky i fundit u arrestua menjëherë pas rastit, pasi dyshohet se gjatë këtij konflikti, dëmtoi me mjet prerës, 70-vjeçarin;
-shërbimet e Komisariatit të Policisë Nr. 2, në bashkëpunim me shërbimet e DVP Vlorë, kapën dhe ndaluan shtetasin e shpallur në kërkim, A. Xh., 40 vjeç, me masë sigurie “Arrest në burg”, nga Gjykata e Tiranës, për veprën penale “Vjedhja”;
-shërbimet e Komisariatit të Policisë Rrugore kapën dhe ndaluan shtetasin e shpallur në kërkim, A. Sh., 43 vjeç, banues në Tiranë, i dënuar me 1 muaj burgim, nga Gjykata e Tiranës, për veprën penale “Drejtimi i automjeteve në mënyrë të parregullt”;
-shërbimet e Komisariatit të Policisë Rrugore kapën dhe ndaluan shtetasin e shpallur në kërkim, E. L., 61 vjeç, banues në Tiranë, i dënuar me 2 muaj burgim, nga Gjykata e Tiranës, për veprën penale “Drejtimi i automjeteve në mënyrë të parregullt”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
