Procesi i vonuar i primareve në PD, për të zgjedhur përmes votës së anëtarësisë kandidatët për deputetë në zgjedhjet e 11 majit duket se po nis.
Hapi i parë, është një mesazh i mbërritur këtë të enjte tek krerët e degëve të PD, që i njofton se shpejt primaret do të nisin, e për këtë arsye, nëse duan të jenë pjesë e procesit duhet të japin dorëheqjen nga pozicioni i tyre si drejtues lokalë.
“Nëse keni vendosur të garoni në primare, duke u përfshirë në rrethin e kandidaturave elektorale, brenda ditës së diel datë 26 janar 2025 duhet të depozitoni dorëheqjen tuaj nga pozicioni i kryetarit të degës pranë Sekretariatit të Organizimit”-thuhet në mesazhin e siguruar.
Ndërkohë në PD ende nuk është miratuar rregullorja, e cila do të përmbajë rregullat e zhvillimit të primareve. Në to, me gjasë do të ‘kursehen’ drejtuesit e qarqeve, të cilët sipas burimeve nuk do t’i nënshtrohen votës së anëtarësisë, por do të jenë automatikisht pjesë e listës së mbyllur të kryetarit.
Ky proces zhvillohet në një kohë kur zëra brenda PD, madje edhe në ekipin drejtues të saj, jo-zyrtarisht thonë se ky proces do të sjellë pakënaqësi të panevojshme në prag të zgjedhjeve të 11 majit.
Kujtojmë se ditën e djeshme u miratua dhe numi i përgjithshëm i kandidatëve për deputetë që partitë politike duhet të paraqesin në listat që do të dorëzojnë në Komisionin Qëndror të Zgjedhjeve.
Sipas KQZ listat për deputetë do të duhet të përmbajnë 186 emra kandidatësh, të ndara në 12 qarqet e vendit sipas mandateve respektive.
46 kandidatë pritet të jenë në listë të mbyllur, ndërkohë që 146 të tjerët do të jenë në listë të hapur.
