Nënkryetari i Partisë Demokratike, Agron Gjekmarkaj, ka zhvilluar sot një takim me pensionistët e Kurbinit, ku ka dëgjuar shqetësimet e tyre dhe ka prezantuar angazhimet e PD për mbështetjen e kësaj shtrese.
Në një postim në Facebook, Gjekmarkaj akuzoi qeverinë për neglizhimin e pensionistëve, duke theksuar se prej 12 vitesh ata janë përdorur vetëm për vota dhe nuk janë ndihmuar realisht. Ai u shpreh se pensionistët përballen me vështirësi të mëdha për të siguruar nevojat bazë për shkak të çmimeve të larta dhe pensioneve të pamjaftueshme.
“Një pensionist nuk e mbyll dot muajin me të ardhurat nga pensioni, e aq më keq nën këtë regjim që ka rritur çdo çmim të çdo produkti bazë, por jo masën e pensionit,” tha Gjekmarkaj.
Ai premtoi se, nëse PD vjen në pushtet, brenda tre muajve të parë të qeverisjes, asnjë pension nuk do të jetë më i ulët se 200 euro. Po ashtu, ai u bëri thirrje emigrantëve shqiptarë të regjistrohen për të votuar në zgjedhjet e 11 majit, duke theksuar rëndësinë e angazhimit të diasporës për të ardhmen e vendit.
