Partia Demokratike me firmat e 14-të deputetëve ka dërguar në Gjykatën Kushtetuese një kërkesë lidhur me mandatin e deputetit socialist, Vullnet Sinaj i cili akuzohet nga opozita se ka përfituar me bizneset e tij nga fondet e buxhetit të shtetit.
PD i kërkon Gjykatës Kushtetuese të detyrojë Kuvendin që ta dërgojë mandatin e Sinajt për shqyrtim. Kuvendi me votat e mazhorancës në 30 janar rrëzoi raportin e opozitës për mandatin e Sinajt duke vendosur mosdërgimin e tij në Gjykatën Kushtetuese.
Deputetët opozitarë kërkojnë “zgjidhjen e konfliktit të kompetencave mes Kuvendit të Shqipërisë dhe subjektit kushtetues në konflikt, jo më pak se 1/10 e deputetëve”.
“Në datën 5.03.2025, u depozitua në Gjykatën Kushtetuese dokumentacioni me dërgues 14 deputetë të Kuvendit të Shqipërisë dhe objekt:/lëndë: Detyrimin e Kuvendit të Shqipërisë për dërgimin në GJ.K të mocionit të konstatimit të papajtueshmërisë së mandatit të deputetit Vullnet Sinaj”, thuhet në njoftimin e bërë publik nga Gjykata Kushtetuese ku konfirmohet regjistrimi i çështjes.
Deputetët që kanë firmosur:
-Gazment Bardhi
-Flamur Noka
-Elda Hoti
-Lefter Gështenja
-Edi Paloka
-Sorina Koti
-Erisa Xhixho
-Qani Xhafa
-Petrit Doda
-Eralda Bano
-Dhurata Çupi
-Kasëm Mahmutaj
-Saimir Koreshi
-Ina Zhupa
Socialisti Vullnet Sinaj akuzohet nga opozita se ka përfituar fonde publike ndërkohë që ushtron mandatin e deputetit. Përmes bizneseve të tij, Sinaj akuzohet se ka përfituar 36 mijë euro nga buxheti i shtetit.
