Në prag të 8 Marsit, Ditës Ndërkombëtare për të Drejtat e Gruas, Ministria e Shëndetësisë dhe Mbrojtjes Sociale në bashkëpunim me Un Women organizuan aktivitetin “Takim Brezash: Tre dekada ndryshimi për barazinë gjinore dhe fuqizimin e grave”.
Me pjesëmarrjen e Ministres së Shëndetësisë dhe Mbrojtjes Sociale, Albana Koçiu, ambasadorit të BE-së në Tiranë, Silvio Gonzato, zv. Ambasadorit të ri të Suedisë dhe Kreu i Agjencisë Suedeze për Zhvillim, Erik Illes, përfaqësueses së Përhershme të OKB-së në Shqipëri, Fiona McCluney si dhe nga shoqëria civile, fokusi u vu te progresi i bërë deri tani dhe avancimi më tej i të drejtave të grave, fuqizimi ekonomik dhe mbrojtja nga dhuna si çelësi për përmbushjen e Objektivave të Zhvillimit të Qëndrueshëm dhe standardeve të anëtarësimit në BE.
Në fjalën e mbajtur gjatë aktivitetit, ministrja Koçiu tha se baza që kemi ndërtuar është një pikënisje shumë e fortë për hapat e mëtejshëm duke vënë në dukje se “sot, kemi më shumë gra në politikë, diplomaci, sipërmarrje dhe në profesione dikur të paimagjinueshme për to”.
Koçiu vuri në dukje progresin në disa fusha që nga korniza ligjore ku ofrohet ndihma juridike falas për gratë dhe vajzat. “Ky kuadër përfshin, ndër të tjera, dispozita si ndihma juridike falas për gratë dhe vajzat, në të gjithë diversitetin e tyre dhe veçanërisht për ato nga grupet më të margjinalizuara”, nënvizoi ajo.
Ministrja solli në vëmendje angazhimet e ndërmarra duke fuqizuar mekanizmat e mbrojtjes dhe mbështetjes në nivel lokal si, trajtimin e rasteve të dhunës në të 61 bashkitë përmes Mekanizmit të Koordinuar të Referimit (MKRs), zgjerimin e shërbime të kujdesit social nga 14 në 39 shërbime për gratë dhe vajzat si dhe trefishimin e mbështetjes ekonomike për të mbijetuarit e dhunës në familje.
Ministrja e Shëndetësisë dhe Mbrojtjes Sociale nënvizoi se “modeli shqiptar i buxhetimit të përgjithshëm gjinor është një histori suksesi që vazhdon të evoluojë. Kemi rritur ndjeshëm përqindjen e shpenzimeve totale të buxhetit në Programet Buxhetore Afatmesme për çështjet gjinore”.
“Jam padyshim besimplote që po të jemi bashkë në një aleancë të fuqishme do të arrijmë mësë miri të gjithë këtyre përpjekjeve dhe do vazhdojmë të jemi akoma më krenar për arritjet që kemi bërë dhe që do vazhdojmë të bëjmë së bashku”, u shpreh ministrja e Shëndetësisë dhe Mbrojtjes Sociale, Albana Koçiu .
