Koordinatori për programin ekonomik në Partinë Demokratike, Dorjan Teliti, ka prezantuar programin e PD për familjen dhe strehimin, një nga prioritetet kryesore të partisë nëse merr pushtetin pas zgjedhjeve të ardhshme.
Sipas Telitit, forcimi i familjes dhe garantimi i strehimit janë thelbësore për zhvillimin e një ekonomie të qëndrueshme. Në këtë kuadër, PD premton subvencionimin e kredive për 5,000 çifte të reja çdo vit (20,000 familje brenda mandatit 2025-2029). “Shteti do të mbulojë çdo interes mbi 1% të normës së kredisë, duke lehtësuar ndjeshëm kostot e banesave”, u shpreh Teliti.
Sipas tij do të ketë bonus nga 10,000 deri në 25,000 euro për ata që nuk duan të përfitojnë nga subvencionimi i kredive dhe këto fonde mund të përdoren për blerjen e një apartamenti të ri ose rikonstruksionin e një banese ekzistuese
“Pa një familje të fortë, nuk ka shoqëri dhe ekonomi të qëndrueshme,” – u shpreh Teliti, duke theksuar se PD synon ta bëjë strehimin më të aksesueshëm dhe të mbështesë të rinjtë që duan të ndërtojnë jetën e tyre në Shqipëri.
Postimi i Telitit:
FAMILJA DHE STREHIMI – PRIORITET I SALI BERISHËS KRYEMINISTËR DHE PD-së NË QEVERISJE .
Pa një familje të fortë, nuk ka shoqëri dhe as ekonomi të qëndrueshme! Familja është shtylla e kombit tonë, dhe një nga shqetësimet më të mëdha të saj është strehimi.
Për të fuqizuar familjet shqiptare, Partia Demokratike angazhohet për:
Subvencionimin e normave të interesit të kredive për 5,000 çifte të reja çdo vit (20,000 brenda mandatit 2025-2029), duke garantuar që ata të paguajnë interesa maksimumi deri në 1%, ndërsa çdo kosto interesi mbi këtë nivel do të mbulohet tërësisht nga buxheti i shtetit.
Alternativisht, çiftet që nuk duan të përfitojnë nga skema e subvencionimit, mund të zgjedhin një bonus nga 10,000 deri në 25,000 euro (pagese e vetme) për:
- Blerjen e një apartamenti , ose
- Rikonstruksionin e një banese ekzistuese
Ky është një angazhim dhe hap konkret për të ndihmuar familjet të ndërtojnë të ardhmen e tyre në Shqipëri!
