Duke folur në një lidhje live për emisionin MAX Sport në Euronews Albania, gazetari kosovar Arlind Sadiku tha se ka informacione të besueshme që ndeshja Serbi-Shqipëri e planifikuar për tu luajtur më 7 qershor nuk do të zhvillohet në Beograd.
Ai thotë se ndeshja është spostuar për tu luajtur në qytetin e Novi Sadit. Sipas tij, kjo është bërë për të minimizuar incidentet e mundshme, pasi në Novi Sad numri i huliganëve pritet të jetë më i ulët për shkak edhe të stadiumit, i cili ka një kapacitet më të vogël se ai i Beogradit.
“Sipas informacioneve që kam, ndeshja nuk do të zhvillohet në Beograd, por do të bëhet në Novi Sad, i cili është një qytet në veri të Serbisë dhe larg kryeqytetit dhe trojeve shqiptare. Atje thuhet se është më lehtë të kontrollohen turmat, tifozët. Numri i ulseve në stadium është shumë më i ulët në Novi Sad sesa në Beograd. Grupi i ultrasve dhe huliganëve serbë do të jetë në numër më të ulët dhe i limituar në Novi Sad, dhe mendoj se serbët do të jenë të kujdesshëm për të mos lejuar ndonjë befasi, siç ndodhi në vitin 2014, kur u ngrit droni autokton nga Ballist Morina”, tha Sadiku.
I pyetur nga moderatori i MAX Sport nëse ai do të shkojë në stadiumin e Novi Sadit për të komentuar ndeshjen Serbi-Shqipëri drejtpërdrejt, ai u shpreh se po i rekomandohet që të mos shkojë atje, pasi mund të rrezikojë që të arrestohet nga policia serbe për shkak të simbolit të shqiponjës që bëri gjatë eliminatoreve të Kampionatit Evropian ndërsa tha se nuk friksohet, pasi ndihet i pastër dhe nuk ka lënduar askënd.
“Shumë njerëz po më rekomandojnë që të mos shkoj në Serbi për shkak të politikës që është atje, pasi janë provokuar nga gjesti që bëra unë për shkak të asaj shqiponje që bëra në Kampionatin Evropian. Unë nuk frikësohem sepse kam bërë një simbol që është krenari për shqiptarët, nuk kam lënduar askënd dhe nuk kam provokuar askënd. Nuk kam bërë asgjë të keqe që të mos shkoj ose të kem frikë. E kam plan të shkoj në Serbi,” tha gazetari i njohur Sadiku.
