Reforma në drejtësi në Shqipëri do të vijojë të ketë mbështetjen amerikane edhe nga administrata Trump. Ekspertët amerikanë të OPDAT janë rikthyer në SPAK për t’i ofruar asistencë hetimeve të prokurorëve të posaçme, rreth dy muaj pasi urdhrit të Trump që ngriu fondet për ndihmën ndërkombëtare të SHBA. Këtë të enjte, 27 mars, ata janë rikthyer zyrtarisht në SPAK për të nisur punën, dhe janë të njëjtët persona që kanë qenë edhe para pezullimit.
Ditën e djeshme kanë patur një takim me prokurorët e SPAK, të cilëve iu kanë njoftuar vendimin administratës amerikane për rikthimin në pozicionet e mëparshme të tyre. Bëhet fjalë për një prokuror, ekspertë të zbatimit të ligjit në SHBA (përfshirë FBI), të cilët asistojnë strukturat e drejtësisë në Shqipëri, me trajnime dhe ekspertizë. SPAK zyrtarisht nuk ka dhënë informacion dhe mbi çfarë vendimi është bërë rikthimi i tyre në Shqipëri.
Kujtojmë se largimi i përkohshëm i ekspertëve amerikanë nga SPAK u interpretua nga mediat dhe eksponentë të opozitës të kryesuar nga Sali Berisha, i marrë vetë i pandehur për korrupsion nga Prokuroria e Posaçme, si braktisje e drejtësisë e re në Shqipëri nga Uashingtoni zyrtar
Mbështetja amerikane për Prokurorinë e Posaçme nuk është financiare pasi struktura financohet nga buxheti i shtetit, por konsiston me infrastrukturë konkrete, logjistikë, trajnime e vizita studimore, pajisje të ndryshme teknike dhe në sistemin e menaxhimit të çështjeve. Rikthimi në SPAK dhe GJKKO i ekspertëve të OPDAT i jap rrugë edhe agjencive të tjera amerikane si ICITAP, DEA e FBI.
Ndërprerja e përkohshme e bashkëpunimit erdhi pas urdhrit ekzekutiv të Presidentit amerikan, për pezullim të fondeve ndërkombëtare të Shteteve të Bashkuara, përmes të gjitha agjencive të saj, sidomos USAID, me qëllim rishikimin dhe rishpërndarjen me transparencë. Tashmë DASH dhe departamenti i efiçencës janë në fazën përmbyllëse të përcaktimit të projekteve për të cilat ndërpritet përfundimisht financimi ose do të vijojë dhe mesa duket mbështetja për reformën në drejtësi në Shqipëri nuk do të preket.
