TIRANË– Misioni i OSBE/ODIHR ka nisur zyrtarisht punën për monitorimin e procesit zgjedhor në Shqipëri. Kreu i misionit, Lamberto, gjatë konferencës për mediat në Tiranë, bëri me dije se për monitorimin e procesit zgjedhor të 11 majit do të angazhohen 300 vëzhgues afatshkurtër dhe 26 vëzhgues afatgjatë, që do të shpërndahen në 12 qarqet në Shqipëri.
“Sot hapim zyrtarisht misionin e vëzhgimit të zgjedhjeve të OSBE-ODIHR. Për ditën e zgjedhjeve do të kërkojmë 300 mbikëqyrës afat shkurtër që do të vijnë në Shqipëri pak para zgjedhjeve. Në ditën e zgjedhjeve do të ketë një komponent më të gjerë të vëzhguesve, vëzhgues nga Asambleja Parlamentare e OSBE, Asambleja Parlamentare e KiE dhe Parlamenti Evropian. Qëllimi i këtij misioni do të jetë vlerësimi i kryerjes së këtij procesi, nëse do të jenë në përputhje me angazhimet e Shqipërisë ndaj OSBE-së dhe detyrime të tjera të Shqipërisë, si edhe përputhja me legjislacionin vendas”, theksoi Zannier.
Sipas Zannier, vëzhgimi i OSBE/ODIHR do të shtrihet në të gjitha aspektet, nga kuadri ligjor, fushata elektorale, mbulimi mediatik dhe puna e administratës zgjedhore në të gjitha nivelet. Zannier theksoi se një vëmendje e veçantë do t’i kushtohet edhe zbatimit të rekomandimeve të dhëna nga ODIHR në proceset e mëparshme zgjedhore, si dhe monitorimit të fushatës në rrjetet sociale.
“Do të monitorojmë nga afër të gjitha aspektet e zgjedhjeve, si kuadri ligjor, zbatimi i fushatës edhe në rrjetet sociale, puna e administratës zgjedhore në të gjitha nivelet, mosmarrëveshjet dhe mbulimi mediatik në përgjithësi. Si pjesë e këtij procesi do të jenë edhe takime me përfaqësues të shtetit, partive politike, shoqërisë civile, medias dhe faktorit ndërkombëtar”, u shpreh Zannier.
I pyetur mbi planin e SPAK për hetimin e krimeve zgjedhore dhe mundësinë e bashkëpunimit për raportimin e shkeljeve, Zannier u shpreh se misioni do të ndjekë metodologjinë e tij të vëzhgimit dhe çdo gjetje do të bëhet publike përmes raporteve zyrtare.
“Bashkëpunimi me autoritetet është i rëndësishëm, por gjetjet tona do të ndahen përmes raporteve zyrtare,” tha Zannier.
Një ditë pas zgjedhjeve, OSBE/ODIHR do të publikojë një raport paraprak me gjetjet kryesore të procesit, ndërsa raporti përfundimtar, me një vlerësim të detajuar të zgjedhjeve, pritet të publikohet disa javë më pas.
“Një ditë pas zgjedhjeve do kemi gjetjet dhe përfundimet paraprake të misionit që do prezantohen ditën pas zgjedhjeve dhe në fund një vlerësimin tërësi i të gjithë procesit të zgjedhjeve që do bëhet me raportin përfundimtar”, tha ai.
I pyetur mbi rekomandimet e OSBE-ODHIR që ende nuk janë zbatuar, Zannier tha “Puna jonë të monitorojmë ku jemi me rekomandimet në kuadrin ligjor dhe rregullator. Ne diskutuam edhe me aktorët kryesorë në vend dhe dimë se puna për zbatimin e rekomandimeve vazhdon. Do thoja që për rekomandimet, puna vazhdon në disa mënyra, prezencës së OSBE këtu në Shqipëri. Puna jonë këtu është të ngremë problemet që shohim, të tregojmë se ku jemi përmes raporteve tona.”
Monitorimi i OSBE/ODIHR do të vijojë deri në përfundimin e procesit zgjedhor.
