Kreu i Partisë “Mundësia”, Agron Shehaj, deklaroi si ai dhe Partia Mundësia do të vijojnë ta luftojnë korrupsionin, njësoj siç ka bërë ai që prej ditës së parë që është futur në politikë.
I pyetur në një intervistë televizive për mënyrën se si po bën fushatën, duke i takuar qytetarët në vendet e tyre të punës, Shehaj tha se kërkon të gjejë një mënyrë për të folur me ta, duke u njohur me problemet e tyre të përditshme.
“Unë nuk shkoj atje për t’u shitur si kamarier, por unë kam punuar për shumë vite kamarier. Kam bërë shumë profesione për të mbajtur veten, pasi unë nuk kam lindur milioner, por ia kam dalë me punë, nga hiçi. Unë shkoj atje sepse zgjedh të shkoj atje të qëndroj në krah të atyre që duan t’ia dalin me punë të ndershme. Impakti ka qenë shumë pozitiv.
Më bën përshtypje që qytetarët që unë takoj, nuk e kanë hallin se çfarë ka thënë Berisha apo Adriatiku për mua, por kanë hallet e tyre të përditshme. Një zonjë mu ankua që para 10 muajsh i kishin mbyllur biznesin nga hiçi. Një biznes me të cilin kishin jetuar 15 vitet e fundit. Kjo është arsyeja pse unë kërkoj të gjej një mënyrë për të folur me qytetarët”, tha Agron Shehaj.
Pyetjes “ngacmuese” të gazetares, “a keni shokë nga e shkuara”, Shehaj iu përgjigj:
“E di cilët janë shokët e mi nga e shkuara? Barbara Doda, një vajzë e re, që ishte brenda PD-së, dhe doli nga ajo parti për t’i sjellë Shqipërisë një ndryshim. Është Erald Kapri, historian, edhe ai ka qenë prej vitesh në politikë si aktivist. Janë me mijëra të tjerë në të gjithë Shqipërinë, që i janë bashkuar thirrjes. Njerëz që unë nuk i njihja, por na janë afruar sepse besojnë ata që ne po bëjmë”– u shpreh Agron Shehaj.
Ai tha Partia Mundësia nuk bën pazare, është një projekt afatgjatë për ta kthyer Shqipërinë në një vend të mundësive.
“Për mua nuk është posti i rëndësishëm, është vizioni. Unë nuk kam asnjë hall. Unë jam në politikë jo për të sjellë rotacionin, por për të sjellë ndryshimin. Unë kam qenë brenda PD-së, më ka dhënë mundësi dhe kam patur një mbështetje shumë të madhe nga votuesit, dhe për këtë u jam mirënjohës dhe kam respekt të jashtëzakonshëm. Fatkeqësisht PD nuk ndryshoi mjaftueshëm për të bërë dallimin me korrupsionin e Edi Ramës dhe kjo është arsyeja që unë kam dal nga Partia Demokratike.
Unë jam këtu për të folur për të ardhmen dhe kjo është rruga e duhur. Ne nuk duhet të dorëzohemi dhe nuk duhet të biem pre e pazareve. Shikojmë gjithë të tjerët, kanë bërë koalicione me PD e me PS”, u shpreh kreu i “Mundësisë”.
