Në një ceremoni të veçantë, ku morën pjesë personalitete nga fusha të ndryshme, Ilirjan Alliu, është vlerësuar me titullin “Legjendë e Futbollit Shqiptar” nga FSHF për kontributin e dhënë si futbollist, dhe tani analist në programin “Max Sport”.
Hapat e parë në karrierë, Alliu i hodhi te Sopoti, ku në 1990 u bë pjesë e ekipit të parë.
Aty spikati si mbrojtës krahu ndërsa dha kontributin e tij për ta promovuar ekipin në elitën e futbollit shqiptar për herë të parë në histori duke fituar edhe titullin e Kategorisë së Parë.
Më pas karriera e tij njohu rritje, duke luajtur për ekipi si Tirana, Teuta, dhe Flamurtari, ndërsa, Elbasani, ishte stacioni i fundit, ku vari këpucët në gozhdë në vitin 2003.
Gjatë karrierës Alliu, fitoi titullin kampion në sezonin 1993-1994 dhe Kupën e Shqipërisë në 94-95 me një brez të shkëlqyer lojtarësh të Teutës së Durrësit.
Ndërkohë ishte anëtar i ekipit Shpresa nga viti 1993-1994 dhe nga 1994 deri në 1997 pjesëtar i ekipit kombëtar.
Presidenti i FSHF-së, Armand Duka, vlerësoi kontributin e Alliut, ndërsa evidentoi vitet e tij të arta tek Teuta, ku fitoi dy trofe.
Vetë Alliu nuk i fshehu emocionet për këtë vlerësim, ndërsa e quajti si një prej momenteve më të bukura të jetës së tij.
“Sot është një nga ato momente të veçanta në jetë, kur ndjej krenari, mirënjohje dhe emocion të jashtëzakonshëm. Të vlerësohesh me titullin “Legjenda e Futbollit Shqiptar” është një nder i madh dhe një motivim i jashtëzakonshëm për gjithçka që kam dhënë dhe përfaqësuar në fushën e blertë.
Faleminderit nga zemra të gjithë atyre që kanë besuar tek unë, që më kanë mbështetur dhe më kanë vlerësuar gjatë gjithë karrierës sime. Ky çmim nuk është vetëm i imi, por i të gjithë atyre që më kanë frymëzuar, më kanë qëndruar pranë dhe kanë qenë pjesë e këtij rrugëtimi.
Një falënderim i veçantë shkon për Federatën Shqiptare të Futbollit dhe Presidentin Armand Duka, të cilët me këtë vlerësim më kanë dhuruar një nga momentet më të bukura të jetës sime. Mbështetja dhe përkushtimi juaj për futbollin shqiptar është një shtysë për çdo brez që vjen.
Faleminderit të gjithëve! Ky nuk është vetëm një çmim që më përket mua, por edhe gjithë tifozëve, bashkë lojtarëve dhe njerëzve që e duan futbollin shqiptar. Respekt dhe mirënjohje gjithmonë”, tha Alliu.
Ilir Shulku, sekretari i përgjithshëm i FSHF-së, së bashku me ish-portierin e kombëtares Perlat Musta dhe ish-futbollistin Besnik Kola, dhanë impresionet e tyre për Alliun si futbollist.
