Pas deklaratës së anëtarit të Kryesisë së Partisë Demokratike, Belind Këlliçi, ku akuzoi Policinë e Shtetit për moszbatim të një urdhri të SPAK në lidhje me kontrollet në tregun e Elbasanit, Policia e Shtetit ka reaguar, duke i cilësuar akuzat si “të pavërteta dhe shpifje politike”.
Në një reagim publik për mediat, Policia e Shtetit shprehet se është e indinjuar nga sulmet e përsëritura të përfaqësuesve të Partisë Demokratike, duke theksuar se akuzat synojnë të dëmtojnë imazhin e institucionit dhe të frenojnë zbatimin e ligjit në territor.
“Deklarata e sotme nuk është asgjë tjetër veçse vijim i përpjekjeve të përditshme për të përbaltur qindra mijëra punonjës të Policisë së Shtetit, që çdo ditë kryejnë detyrën me përkushtim dhe profesionalizëm,” thuhet në reagim.
Policia thekson se nuk ka refuzuar asnjë urdhër të ndonjë agjencie ligjzbatuese dhe se çdo detyrë përmbushet në përputhje me ligjin. Ajo nënvizon se partnerët ndërkombëtarë e vlerësojnë si një nga institucionet më të besueshme dhe efektive në rajon.
Reagimi i Policisë së Shtetit:
Policia e Shtetit shpreh indinjatën e thellë për përpjekjet e vazhdueshme të përfaqësuesve të subjektit politik “Partia Demokratike” për të përbaltur punën e Policisë së Shtetit, punë e cila vlerësohet përditë nga partnerët dhe agjencitë ligjzbatuese më prestigjioze ndërkombëtare.
Deklarata e sotme nuk është asgjë tjetër veçse vijim i përpjekjeve të përditshme, duke sajuar e akuzuar pa të drejtë qindra mijëra punonjës të Policisë së Shtetit dhe stafet drejtuese të tyre.
Policia e Shtetit, siç ka treguar besueshmëri e profesionalizëm, përkushtim e vendosmëri përkrah partnerëve në luftë kundër krimit, edhe me agjencitë ligjzbatuese brenda vendit ka të njëjtin standard dhe marrëdhënie mjaft të mira në interes të zbatimit të ligjit.
Sqarojmë opinionin publik se Policia e Shtetit nuk ka refuzuar asnjëherë të përmbushë detyrat e ngarkuara sipas ligjeve në fuqi, por i ka zbatuar dhe përmbushur ato me profesionalizëm e konform ligjit.
Këto sulme, duke tentuar të intimidojnë strukturat dhe drejtuesit e Policisë së Shtetit, kanë vetëm një qëllim, të frenojnë revanshin e ligjit në territor ndaj çdo paligjshmërie, si dhe të krijojnë krisje të besimit të qytetarëve te Policia, e cila është institucioni më i besuar nga qytetarët, bazuar kjo në anketimet e bëra nga organizatat ndërkombëtare që asistojnë punën e Policisë së Shtetit.
Për Policinë e Shtetit, qytetari dhe ligji janë të shenjta, dhe këtë aleancë nuk do të mund ta cenojnë shpifjet nëpërmjet shkrimeve në rrjete sociale e portale apo deklaratat politike.
Cilido punonjës policie që do të shkelë këtë aleancë dhe do të bëhet palë me paligjshmërinë, do të marrë ndëshkimin më të ashpër sipas ligjit, duke u përballur me drejtësinë dhe me largimin e menjëhershëm nga radhët e Policisë së Shtetit.
Garantojmë qytetarët dhe të gjitha subjektet politike se Policia e Shtetit është tërësisht e baraslarguar nga subjektet politike dhe e fokusuar vetëm në zbatimin e ligjit, garantimin e rendit e sigurisë përgjatë fushatës elektorale dhe paprekshmërisë së votës gjatë ditës së votimit.
