Kandidatja e koalicionit “Djathtas për Zhvillim”, Edlira Devolli Leka, ka shprehur mbështetjen e saj të fortë për gratë kryefamiljare dhe nënat që kujdesen për fëmijët me aftësi ndryshe apo me autizëm. Në një deklaratë publike, ajo u angazhua për politika konkrete që synojnë lehtësimin e jetës së tyre përmes mbështetjes financiare, shërbimeve sociale dhe kushteve më të mira pune.
“Gratë kryefamiljare janë shtylla e shtëpisë dhe shpesh edhe e komunitetit. Në programin tonë, ato nuk janë të padukshme,” shkroi Devolli Leka.
Ndër propozimet e saj përfshihen: banesa sociale për familjet me një prind, pagë mujore për nënat që nuk mund të punojnë për shkak të kujdesit ndaj fëmijëve, ngritja e qendrave rajonale për fëmijët me aftësi ndryshe dhe trajtim pa pagesë për fëmijët me autizëm në familjet në nevojë.
Ajo gjithashtu propozon rishikimin e kodit të punës, për të mundësuar orar të reduktuar për nënat me fëmijë deri në 6 vjeç, pa humbur të drejtën e pagës së plotë.
