Nga Jonida Omeri
Drejtuesit politikë të partive garuese në zgjedhjet e 11 majit nuk kanë komunikuar vetëm me votuesit. Ata kanë gjetur mënyra të ndryshme për të shigjetuar edhe kundërshtarët. Simbolika, epitete, e deri te prodhimet regjisoriale kanë qenë pjesë e komunikimit të tyre në rrjetet sociale.
Sipas ekspertëve të komunikimit, gjuha e përdorur duket një metodë që i përshtat ata me shpejtësinë e rrjeteve sociale.
“Ajo që po shohim është thjeshtë një përplasje memesh, videosh virale për të marrë klikime. Një imitim kryekëput i rrjeteve sociale dhe algoritmeve si ato funksionojnë. Le t’i lënë memet dhe videot virale, tua lënë personazheve të humorit apo njerëzve të tjerë të rrjetit”, tha Jonila Godole.
“Nga njëra anë kryeministri Rama e ka mbyllur TikTok, por nga ana tjetër përdor në rrjete sociale gjuhën e TikTok”, u shpreh Elvin Luku.
“Është një shprehje e qartë e populizmit, një përpjekje për t’u thënë njerëzve unë flas si ju dhe meqë flas si ju jam si ju, kështu që meritoj mbështetjen tuaj”, theksoi Elsa Skënderi.
Ekspertët e komunikimit kërkojnë debate të thella dhe të kuptueshëm nga të gjitha partitë në mënyrë që ato tu drejtohen qytetarëve.
“Nuk kemi një përplasje idesh, nuk kemi ide të reja që do na tregonin vizionin për Shqipërinë e 4 viteve të ardhshme. Nuk shoh një strategji të bazuar në vlera”, tha Godole.
“Kur ka komunikim të drejtpërdrejtë të politikanit me audiencën, edhe prirja për propagandë është akoma më e madhe”, u shpreh Luku.
