Historia katërvjeçare e “dashurisë” mes skiatores Lara Kolturi dhe Shqipërisë po vjen drejt fundit. Sportistja e talentuar, një nga emrat e rinj më premtues në panoramën botërore të skive, pasi ka kaluar këto vite duke përfaqësuar Shqipërinë në arenën ndërkombëtare, tashmë po bëhet gati që të kthehet te vendi i lindjes, Italia.
Potenciali i skiatores ishte i dukshëm por meqë programet e Federatës Italiane ishin të ndryshme nga ato që kërkonin prindërit e saj që bënin edhe rolin e trajnerit, ata zgjodhën që Kolturi të përfaqësonte Shqipërinë.
Kështu, që në vitet e para të adoleshencës ajo u stërvit sipas kërkesave të saj, duke zgjedhur garat që dëshironte, edhe pse jo me flamurin italian, por atë shqiptar.
Këtë vit, Kolturi u afirmua në skenat me të rëndësishme të garave të skive në botë duke përfaqësuar Shqipërinë, teksa linte pas me lehtësi shumë nga garueset e tjera italiane. Ndaj edhe Italia tani është e gatshme që të pranojë çdo kushti që ka ajo, pak a shumë siç ishte te Shqipëria ku i lihej liri e plotë vendimmarrje për sa kohë që garantonte suksese e reklamë pozitive.
Kësisoj, Kolturi ka depozituar pak ditë më parë në KOKSH kërkesën për ndryshimin e Federatës, pjesë e procedurës bazë për transferimin nën varësinë e Komitetit Olimpik të një shteti tjetër.
Objektivi i saj është që Lojërat Olimpike Dimërore të vitit 2026 në Milano të garojë për Italinë dhe duke parë formën dhe potencialin e saj, nuk është aspak çudi që të jetë një prej medalisteve të këtij aktiviteti. Ndërsa Shqipëria do t’i kthehet “normalitetit, që do të thotë të garojë në një aktivitet të tillë me ftesa për sportistë të saj, pa shanse reale për t’iu afruar zonës së medaljeve.
