Pas ngjarjes tragjike të ndodhur më 20 prill 2025 në fshatin Valare, ku u gjet i vetëvarur në ambientet e jashtme të banesës së tij 15-vjeçari V.P., Prokuroria pranë Gjykatës së Shkallës së Parë të Juridiksionit të Përgjithshëm Gjirokastër ka reaguar zyrtarisht përmes një njoftimi për mediat.
Sipas informacionit zyrtar, menjëherë pas njoftimit nga Komisariati i Policisë së Gjirokastrës, me urdhër të Drejtuesit të Prokurorisë është ngritur grupi hetimor, me përfshirjen e prokurorit të seksionit për të mitur dhe prokurorit të gatshëm.
Veprimet e para hetimore kanë përfshirë këqyrjen e vendit të ngjarjes, kryerjen e ekspertizës mjeko-ligjore, sekuestrimin dhe analizimin e telefonave, pajisjeve elektronike dhe materialeve shkollore të të miturit, si dhe marrjen e dëshmive nga persona me dijeni për rrethanat e rastit, përfshirë edhe punonjësit përgjegjës për trajtimin e të miturit.
Prokuroria bën me dije se nga hetimet paraprake nuk ka indicie apo prova që të sugjerojnë se veprimi tragjik i të miturit lidhet me ngacmime apo bullizëm nga bashkëmoshatarët e tij – një pistë e përfolur fillimisht në rrjetet sociale dhe në opinionin publik.
Hetimet vazhdojnë me prioritet maksimal për të sqaruar plotësisht shkaqet që çuan në këtë ngjarje të rëndë si dhe për të analizuar çdo veprim apo mosveprim të autoriteteve përgjegjëse lidhur me trajtimin e të miturit.
Prokuroria garanton se do të informojë publikun për çdo zhvillim të rëndësishëm në vijim të hetimeve.
