Kryeministri Edi Rama, gjatë një vizite në Glamping Albania Rafting në Përmet, ka theksuar përmirësimet e dukshme në sektorin e turizmit në këtë rajon. Rama u shpreh se këto zona, që dikur ishin të harruara dhe të panjohura për shumë turistë, sot po shohin një zhvillim të shpejtë, me Përmetin që tërheq 150 mijë vizitorë çdo vit dhe Gjirokastrën që arriti 600 mijë turistë në vitin 2024. Ai theksoi se kjo rritje ka ndihmuar në zhvillimin e agro-turizmit dhe ka kontribuar në ekonominë lokale.
Edi Rama: Gjërat kanë ndryshuar, turizmi në zonë është zhvilluar. Unë bëj reklama të gjërave të mira që bëhen në këtë zonë dhe në mbarë Shqipërinë. Është një Shqipëri e tërë që jeton jashtë kënetës mediatike. Gjirokastra ka qenë një vend ku nuk rrihej, ndërsa tashmë ka ndryshuar shumë.
Përmeti ka qenë krejtësisht i harruar. Sot në Përmet ka 150 mijë turistë në vit, ndërsa në Gjirokastër më 2024 kanë ardhur 600 mijë turistë. Të gjithë këta janë konsumatorë, sjellin para që i lënë, sot kemi agro-turizëm. Në gjithë këto vite janë bërë lidhje të rëndësishme infrastrukturore. Kemi ndihmuar fermerët, bujqit.
