Kreu i koalicioni Nisma “Shqipëria Bëhet”, Adriatik Lapaj ishte sot i ftuar në News 24, teksa foli për ecurinë e fushatës së 11 majit.
Lapaj ndjehet i frymëzuar nga ajo që sheh në terren nga takimet e përditshme me qytetarët. Synimi i tij nuk janë 71 mandate, por kushtëzimi që të zhvillohen zgjedhje të reja të parakohshme.
“Ky Tv i nderuar kur u hap ishte i vogël në raport me ato publike. Për shkak të profesionalizmit zuri vend të pazëvendësueshëm dhe sot e kemi dritare të lirë. Ka momente kur subjekte të caktuara kanë epërsi. Por nuk janë të përjetshme. Po ndërtojmë një subjekt model qytetar dhe e vë theksin te idetë, bashkëbisedimi me qytetarët. Kemi epërsi në terren. Nuk kemi instrumenta shtrënguese. Edhe sikur ti donim nuk i kemi. Ata njerëz që vijnë tek ne duan të vijnë.
Jam i frymëzuar nga gjithçka po përjetoj në rrugët e Shqipërisë. Jam besim plotë se më 12 maj do më thërrisni dhe do më uroni për çarjen e sistemit dy partiak. Një subjekt i vogël politik nuk e përballon dot ritmin e fushatës kokë më kokë me partitë e mëdha. Ne nuk na duhen 71 mandate për të çuar Shqipërinë në zgjedhje të parakohshme. Ne duam të kushtëzojmë një qeverisje tjetër që do jetë e profesorëve, diasporës. Këto zgjedhje nuk janë zgjedhje, janë referendum.”
Sa për rezultatin që pret, ai shton se do flasë pas zgjedhjeve.
“Më vijnë sondazhe. Do flas më datën 12 maj. Do jetë një rezultat që askush nuk e ka parashikuar. Ato që themi ne i bëjmë. Ky jam unë, këta jemi si ekip. Më 12 maj do jetë një rezultat befasues. Kryesisht në Tiranë, Durrës dhe Vlorë.”
Lapaj thekson se koalicioni që drejton ka më shumë mbështetje në diasporë se dy partitë e mëdha.
“Si do që të dalë rezultati nuk do i mallkoj njerëzit e mi. do kemi një rezultat, që e kemi pasur si slogan 300 mijë vota në kuti. Të dhënat janë frymëzuese edhe te 18-vjeçarët, edhe te 65 vjeç plus. Mendoj se në diasporë asnjë prej subjekteve tradicionale nuk do ketë epërsi ndaj nesh.”
Më tej jep dhe lajmin se fleta e votimit nuk do ketë numër serial dhe nuk mund të gjurmohet se për kë voton.
“Kam një lajm të mirë. Në këto zgjedhje ka edhe një arritje, që fleta e votimit nuk do ketë numër serial. Për të identifikuar kush votoi kush. Edhe punonjësi i administratës do votojë qetë.”
