Tiranë – Psikiatri dhe psikoterapisti i njohur, Neli Demi, ka shpallur zyrtarisht kandidaturën e tij për deputet në Zgjedhjet e Përgjithshme Parlamentare të 11 Majit, duke përfaqësuar Demokratët Euroatlantikë.
Në një postim publik në rrjetet sociale, Demi rrëfen se për shumë vite kishte menduar se politika nuk ishte vend për idealistët apo njerëzit e ndershëm, por për ata që janë të gatshëm të përshtaten me një sistem që shpesh harron individin. Megjithatë, ai thekson se sot, më shumë se kurrë, nuk mund të pranojë të dorëzohet përballë këtij realiteti.
“Vendosa të bëhem pjesë e Demokratëve Euroatlantikë sepse ky grupim përfaqëson një vizion të ri, ku Shqipëria është një vend i lirë, i sigurt dhe i drejtë, ku politika bazohet në integritet dhe përkushtim të sinqertë ndaj së mirës së përbashkët,” shkruan ai.
Me një karrierë gati 30-vjeçare në fushën e shëndetit mendor, Demi thekson përkushtimin e tij për të dëgjuar dhe mbështetur njerëzit në sfidat e tyre jetësore. Ai shprehet se përmes kësaj përvoje ka kuptuar se ndryshimi nuk vjen nga heshtja, por nga përballja me të vërtetën dhe veprimi me bindje.
Kandidatura e tij vjen pas propozimit nga strukturat e Tiranës dhe miratimit nga Këshilli Kombëtar i Demokratëve Euroatlantikë.
