Policia e Tiranës ka shpallur në kërkim Arjan Telhallarin, i cili mësohet se ka hyrë në zyrën elektorale të një subjekti politik mesditën e sotme dhe është përfshirë në sherr me personat që ndodheshin aty.
Burime nga policia bëjnë me dije se në sallën operative është raportuar se janë dëgjuar të shtëna me armë zjarri, por deri më tani efektivët kanë gjetur vetëm dy fishekë të paplasur.
Policia njofton se Arjan Telhallari është larguar menjëherë pas përplasjes me automjet, ndërsa vijon puna për kapjen dhe shoqërimin e tij.
Siç duket dhe nga pamjet nga vendngjarja, dera prej xhami e zyrës është dëmtuar dhe siipas policisë, dyshohet se është thyer me sende të forta.
Tiranë/Informacion paraprak
Rreth orës 14:00, në sallën operative të DVP Tiranë ka ardhur një telefonatë se në rrugën “Ali Demi” kishte një konflikt midis disa shtetasish, në ambientet e një zyre elektorale.
Gjatë këqyrjes së vendit të ngjarjes, është konstatuar i dëmtuar dyshohet me sende të forta xhami i zyrës së subjektit elektoral.
Po nga këqyrja e vendit të ngjarjes, janë konstatuar dy fishekë luftarak të paplasur.
Menjëherë në vendin e ngjarjes, kanë shkuar forca të shumta policie dhe grupi hetimor. Vijon puna për identifikimin dhe kapjen e shtetasve të përfshirë në konflikt, të cilët janë larguar nga vendi i ngjarjes me një automjet.
Në drejtimin e Prokurorisë vijon puna për zbardhjen e motivit të konfliktit dhe dokumentimin e rrethanave të rastit.
