Kryeministri Edi Rama ishte sot në një takim me të rinjtë në qytetin e Fierit.
Rama në fjalën e tij u shpreh se ndodhemi përpara një momenti historik, në të cilën ftoi të rinjtë që votojnë për herë të parë të bëhen pjesë me votën e tyre për ta çuar Shqipërinë në Bashkimin Evropian.
“Besoj se e keni parë se në këtë rrugëtim drejt 11 majit, jemi ndalur të bëjmë takime të veçanta me vajzat dhe djemtë që votojnë për herë të parë. Këto zgjedhje janë zgjedhjet më të rëndësishme për shumë kohë për votuesit e parë. Çdo zgjedhje ka një rëndësi të veçantë për një komunitet. Nuk ka zgjedhje të parëndësishme.
Jo çdo zgjedhje ka peshën e rëndësisë që nganjëherë fati të vë mbi super kur ditën e zgjedhjeve bashkohen bashkë detyra për të zgjedhur një palë apo individ, edhe misioni për të çuar përpara vendin tënd duke u takuar me historinë. 11 maji është takimi me historinë. Të gjithë votuesit e parë, me votën e tyre do vendosin për Shqipërinë me BE në Europë, për tu bërë qytetarë të barabartë të Europës me pasaportën europiane.”
Më tej, Rama theksoi se zgjedhjet e 11 majit janë të njëjta me ato të 22 marsit 1992, kur u votua PD, jo se ishin shumica me PD-në por sepse ishte momenti historik i ndarjes nga e shkuara.
“Të ndjeni detyrimin që zgjedhjen tuaj ta ndani me të tjerët me shok shoqe, në klasë, auditorë, në fshat, qytet. Janë më shumë sesa zgjedhje për PS, më shumë se sa një mandat i katërt. Janë shumë të ngjashme me zgjedhjet e vitit 92. Kur një shumicë votuan PD, sepse në atë moment ishte koha dhe vendi i duhur, duke votuar për PD shqiptarët të ndanin historinë e së shkuarës me të ardhmen. Më 11 maj duke votuar PS ju do ndanin historinë e derisotme me historinë që nis pas 11 majit. Duke anëtarësuar Shqipërinë në BE.”
