Peshëngritësja e talentuar e klubit Teuta, Enkileda Carja, ka shkruar histori në Lima të Perusë duke u shpallur Kampione Bote e trefishtë në Kampionatin Botëror për të rinj (U17).
Gjithashtu, Enkileda theu tre rekorde europiane dhe fitoi edhe një medalje bronzi në kategorinë për të reja mbi 18 vjeç (U20). Ajo është Kampionia e parë Botërore në histori për Shqipërinë, dhe e tre rekordeve europiane.
Me një performancë të jashtëzakonshme, sportistja 17-vjeçare e KS Teuta, ngriti flamurin kuqezi në majën më të lartë të peshëngritjes ndërkombëtare, duke përfaqësuar Shqipërinë në mënyrën më dinjitoze.
Rezultatet e saj:
• Shkëputje: 94kg, 97kg, 98kg
• Shtytje: 110kg, 113kg, 115kg
• Total: 213kg
Arritjet madhështore:
• 3 medalje ari – Kampione Bote në kategorinë U17
• 1 medalje bronzi në shkëputje në kategorinë U20
3 rekorde të reja europiane (U17):
• 98kg në shkëputje
• 115kg në shtytje
• 213kg në total
Ky është një sukses i jashtëzakonshëm për Enkiledën, për trajneren e saj Eglantina Kalemi, për klubin Teuta dhe drejtorin Kreshnik Leka, që e afroi në ekipin tonë duke besuar tek vlerat e saj, si dhe për gjithë sportin shqiptar.
Carja është një model frymëzimi për brezat e rinj dhe një dëshmi se pasioni, përkushtimi dhe puna e palodhur sjellin rezultate të mëdha.
