Kandidati i Lëvizjes Bashkë, Arlind Qori, ka dhënë një intervistë për gazetarin Ermal Qori, ku ka komentuar zhvillimet e fundit të fushatës elektorale, duke iu përgjigjur edhe akuzave të Kryeministrit Edi Rama.
Kreu i qeverisë e kishte krahasuar Qori me Ilir Metën, duke theksuar se Lëvizja Bashkë është një version i ri i ish-Lëvizjes Socialiste për Integrim. Në intervistën e tij, Arlind Qori e mohoi këtë paralelizëm, duke theksuar se Lëvizja Bashkë përfaqëson një model të ri politik dhe nuk ka asnjë lidhje me format e vjetra të politikës së tranzicionit.
Gjatë intervistës, Qori komentoi edhe debatet e tij publike me gazetarin Blendi Fevziu, veçanërisht për çështjen e oligarkëve dhe ndikimin e tyre në jetën politike dhe ekonomike të vendit. Ai tha se Lëvizja Bashkë është e vetmja forcë politike që flet hapur kundër pushtetit të oligarkëve.
Në një deklaratë të fortë, Qori tha se është i gatshëm të japë dorëheqjen nga drejtimi i Lëvizjes Bashkë nëse kjo forcë politike nuk arrin të hyjë në Kuvend pas zgjedhjeve të ardhshme.
“Ne nuk jemi në këtë garë për karrige, por për të ndryshuar sistemin. Nëse nuk e arrijmë këtë synim minimal, hyrjen në Parlament, do të mbaj përgjegjësinë time dhe do të tërhiqem,” deklaroi ai për A-Times.
