Enslemvera Zake, deputetja aktuale dhe një nga figurat më të angazhuara të Partisë Socialiste në Kuvendin e Shqipërisë, ka shpallur zyrtarisht kandidaturën e saj për zgjedhjet parlamentare të 11 majit në Qarkun e Korçës. Me një përvojë të konsoliduar katërvjeçare në legjislaturë, Zake vjen sërish para qytetarëve me një mesazh të qartë: politika është mision, jo karrierë.
Në një deklaratë publike, Zake thekson se angazhimi i saj në politikë ka qenë që nga fillimi një detyrim moral, qytetar dhe profesional, për të kontribuar në zhvillimin ekonomik, forcimin e institucioneve dhe përfaqësimin dinjitoz të qytetarëve në Kuvend. Ajo e përshkruan veten si një përfaqësuese që nuk ka parë politikën si teori, por si praktikë sociale të angazhuar dhe konkrete, të lidhur ngushtë me qytetarin.
“Një dekadë punë me përkushtim, sfida të shumta, objektiva të qarta dhe një garë të vazhdueshme me kohën,” shkruan Zake, duke përmbledhur përvojën e saj institucionale, ku ka mbajtur role të rëndësishme si Sekretare e Grupit Parlamentar të PS, Nënkryetare e Komisionit të Auditimit Publik, Sekretare e Komisionit të Ekonomisë dhe Financave, dhe Anëtare e Komisionit të Edukimit dhe Medias.
Duke reflektuar mbi mandatit e saj, ajo thotë se ka punuar me përkushtim për të sjellë zgjidhje konkrete, për të përmirësuar ligje dhe për të adresuar vakumet institucionale. Zake thekson se pjesëmarrja aktive e qytetarëve është çelësi i një demokracie funksionale dhe roli i përfaqësuesve është ta mundësojnë këtë përfshirje.
Duke cituar filozofët Michel Foucault dhe Jürgen Habermas, Zake ndan bindjen se pushteti i vërtetë qëndron në institucionet dhe në diskursin publik, dhe se politika e mirë kërkon komunikim të hapur dhe reflektim të vazhdueshëm mbi parimet themelore që udhëheqin një shoqëri të drejtë.
Në fund të deklaratës së saj, ajo u bën thirrje qytetarëve të Qarkut të Korçës që ta mbështesin me votë në legjislaturën e re 2025-2029, me besimin se përfaqësimi i saj do të jetë një zë i drejtë në shërbim të interesit publik.
“Ku ligji dhe drejtësia bëhen fjalë, Parlamenti është zëri i kombit, atje nuk flasin partitë, por interesat e tij,” përfundon Zake
