Takimin e radhës elektoral drejtuesi politik i Partisë Socialiste në Vlorë, Bledi Çuçi, e bëri në Novoselë, ku bashkë me kandidatët për deputetë, Evis Allushi dhe Pirro Vengu, kërkuan mbështetjen me votë në 11 maj. Me bërjen e aeroportit, kjo njësi administrative tha Çuçi merr një perspektive krejt tjetër teksa përmendi edhe disa nga investimet madhore që janë bërë këtu për infrastrukturën e mbrojtjes nga përmbytjet.
“Ju do të jeni njësi administrative, pas Rinasit, e dyta në Shqipëri me aeroport ndërkombëtar. Morëm premtimin e fundit nga kryeministri për rrugën nga aeroporti te stacioni. Në 11 maj ne do të votojmë Partinë Socialiste jo thjesht për atë që po bëjmë, por do të jetë mandati kur Shqipëria do të bëhet pjesë e Bashkimit Europian me të drejta të plota, një shtet në familjen më të pasur e me vlerat më të larta të civilizimit. Kjo do të bëhet realitet mandatin e ardhshëm vetëm nga Partia Socialiste dhe Edi Rama”, tha Çuçi.
Më tej ai vlerësoi listën e kandidatëve të PS-së në qarkun Vlorë, një listë përfaqësuese dhe që plotëson çdo shije dhe kërkesë të elektoratit vlonjat tha Çuçi.
“Në 11 maj ne mbyllim përfundimisht tranzicionin dhe hapim një kapitull të ri të Shqipërisë Europiane. S’ka rëndësi jemi majtas apo djathtas. Ne duhet të shkojmë përpara. Kurrë më mbrapa! Në rrugëtimin tonë përgjatë këtij muaji na janë bashkuar shumë edhe përkrahës të PD-së sepse besojnë që e vetmja forcë që mund ta bëjë Shqipërinë pjesë të Europës është Partia Socialiste me Edi Ramën, prandaj ju ftoj të gjithëve në 11 maj të dalim masivisht në zgjedhje për numrin 5”, tha Çuçi.
