Nga data 1 deri më 8 qershor 2025, Shqipëria mirëpret një ndër ngjarjet më të rëndësishme kulturore të vitit: Javën Kulturore Italiane, e organizuar nga Ambasada e Italisë në bashkëpunim me Institutin Italian të Kulturës dhe mbështetjen e Ministrisë së Ekonomisë, Kulturës dhe Inovacionit.
Përmes një kalendari të pasur aktivitetesh, kjo javë sjell në qendër të vëmendjes artin, muzikën, teatrin, modën dhe dizajnin italian, si dhe koncertin e artistit me origjinë shqiptare Ermal Meta, duke përforcuar lidhjet e ngushta kulturore dhe historike mes dy vendeve.
Nga data 1 deri më 8 qershor 2025, Shqipëria mirëpret një ndër ngjarjet më të rëndësishme kulturore të vitit: Javën Kulturore Italiane, e organizuar nga Ambasada e Italisë në bashkëpunim me Institutin Italian të Kulturës dhe mbështetjen e Ministrisë së Ekonomisë, Kulturës dhe Inovacionit.
Përmes një kalendari të pasur aktivitetesh, kjo javë sjell në qendër të vëmendjes artin, muzikën, teatrin, modën dhe dizajnin italian, duke përforcuar lidhjet e ngushta kulturore dhe historike mes dy vendeve.
Programi i plotë i Javës, u prezantua përmes një konference për mediat nga Ambasadori i Italisë në Shqipëri, z. Marco Alberti dhe Zëvendës Ministrja e Ekonomisë, Kulturës dhe Inovacionit, znj. Lira Pipa, e cila theksoi rëndësinë e kësaj jave dhe mbështetjen institucionale për nisma të tilla kulturore.
Aktiviteti i parë me të cilin nis Java Kulturore Italiane do të jetë një koncert i veçantë nga Orkestra “Magna Grecia”, që do të interpretojë në Kishën Katolike në Tiranë, ndërsa më 2 qershor koncerti do të përsëritet në Amfiteatrin e Durrësit, në një hapësirë që ndërthur historinë dhe artin.
Më tej vëmendja zhvendoset drejt modës dhe dizajnit, një industri kreative që vazhdon të gjenerojë talente të reja, stilistë të rinj që interpretojnë traditën italiane me frymën e inovacionit dhe eksperimentimit. Takimi do të zhvillohet në Tiranë, në ambientet e Inside Coin.
Po me datë 2 qershor, por këtë herë në Vlorë, në sheshin ikonik të Lungomares, publiku do të ketë mundësi të ndjekë një koncert “Neri per caso”, të cilët rikthehen në skenë për të festuar 30-vjetorin e suksesit të tyre në Festivalin e Sanremos. Në të njëjtën ditë, në Liceun Artistik “Jordan Misja” në Tiranë, pritet një tjetër performancë klasike nga duoja Lucio Matarazzo dhe Giovanni Masi, një koncert që bashkon teknikat klasike me ato bashkëkohore.
Kurse 3 qershori sjell inovacionin vizual me një video-mapping në ndërtesën historike të ish-hotel “Dajtit”, i ndjekur nga një sfilatë mode me stilistë të rinj.
4 qershori do të jetë dita e muzikës xhaz në Berat, me një koncert të “Aperitivo Italiano”. Në 5 qershor, vëmendja kthehet tek teatri. Në Gjirokastër do të mbahet performanca teatrore “Onora tuo padre – Ndero Babane”, një produksion i përbashkët me artistë nga Italia dhe Shqipëria.
Ndërsa 6 qershori rezervon një ngjarje të rëndësishme muzikore të javës në Teatrin e Operas dhe Baletit, ku pianisti i njohur Giovanni Bertolazzi, i shoqëruar nga Orkestra e Teatrit të Operas dhe Baletit nën dirigjimin e Andreas Solinas, do të interpretojë një program të përzgjedhur të muzikës klasike italiane.
Më 7 qershor, në Amfiteatrin e Butrintit, artisti i njohur me origjinë shqiptare Ermal Meta do të mbajë një koncert emocionues në një prej vendeve më simbolike dhe të mrekullueshme të trashëgimisë kulturore në Shqipëri.
Java Kulturore Italiane do të mbyllet me datë 8-të qershor me një festival njëditor në natyrë me ushqime italiane dhe muzikë.
