Koreografi i famshëm me origjinë shqiptare, Angelin Preljocaj u pranua ditën e djeshme zyrtarisht si anëtar i Akademisë së Arteve të Bukura të Francës.
Ministri i Ekonomisë, Kulturës dhe Inovacionit, Blendi Gonxhja shprehet se ndihet “krenar që një emër shqiptar, Angelin Preljocaj, bëhet pjesë e Akademisë së Arteve të Bukura të Francës, një nga institucionet më prestigjioze të artit në botë”.
Gonxhja theksoi se ky është jo vetëm një vlerësim për një karrierë të jashtëzakonshme, por edhe një nderim për rrënjët e tij shqiptare, për trashëgiminë tonë kulturore dhe për talentin që e tejkalon kufirin kombëtar.
“Me këtë arritje, Preljocaj jo vetëm që lartëson emrin e Shqipërisë në skenën ndërkombëtare, por është gjithashtu një dëshmi se arti është gjuha që na bashkon të gjithëve”, tha Gonxhja në një postim në rrjetet sociale.
Angelin Preljocaj lindi në Francë, më 19 janar 1957 dhe filloi të studionte baletin klasik përpara se t’i përkushtohej kërcimit bashkëkohor, të cilin e studioi me Karin Waehner, Zena Rommett, Merce Cunningham dhe më vonë Viola Farber dhe Quentin Rouillier. Në dhjetor 1984 Preljocaj themeloi kompaninë e tij.
Që nga fillimet e tij, ai ka krijuar 61 vepra koreografike, duke filluar nga solo në formacione më të mëdha duke përfshirë “Romeo dhe Xhulieta”, “Borëbardha”, “Liqeni i Mjellmave”. Atij i pëlqen të alternojë balete të mëdhenj narrativë me pjesë më abstrakte si Empty Move, Still Life, Deleuze/Hendrix.
Angelin Preljocaj bashkëpunon rregullisht me artistë të tjerë në fusha të ndryshme si muzika, artet pamore, dizajni, vizatimi, letërsia dhe filmat e animuar.
Angelin Preljocaj ka marrë çmime të shumta dhe ka drejtuar disa filma të shkurtër dhe filma me koreografi të tij. Kompania e themeluar prej tij ka 30 kërcimtarë të përhershëm dhe performon mesatarisht 120 shfaqje në vit, në mbarë botën.
