Largimi i Armando Brojës nga Çelsi shikohet si diçka e sigurt. Sulmuesi i Kombëtares shqiptare nuk shfaqet në planet e londinezëve, ndërsa shumë klube në Europë interesohen për shërbimet e tij.
Florian Pletenberg, gazetar i njohur gjerman, zbulon interesin e Volfsburg për Brojën. Më parë nga Gjermania është përfolur Lajpcig ndër të tjerë.
Vlera për Brojën konsiderohet 20 milionë euro. Çelsi e ka produkt të akademisë së tij, ndërsa në pjesën më të madhe të karrierës e ka huazuar.
23-vjeçari ka provuar të luajë për Evertonin, Fulhamin, Sauthempton dhe Vitesh. Kontrata aktuale i përfundon në vitin 2028.
Me Kombëtaren shqiptare ndërkohë ka debutuar në shtatorin e vitit 2020. Gjatë kësaj kohe ka shënuar 5 gola, ndërsa duhet thënë se dëmtimet kanë qenë penalizimi më i madh për të.
