Këngëtarja shqiptare me famë botërore, Dua Lipa, ka treguar se është e hapur për të pasur fëmijë në të ardhmen, megjithëse momenti i duhur mbetet ende një dilemë për të.
Në një intervistë për ‘British Vogue’, artistja 29-vjeçare foli hapur për ëndrrën e saj për të krijuar një familje.
“Do të doja shumë të kisha fëmijë një ditë. Por gjithmonë kam atë pyetjen e brendshme: kur është koha e duhur? Si do të përshtatet me punën time, turnetë, dhe sa kohë do më duhet të marr pushim?”, u shpreh ajo.
Dua tha se e adhuron idenë e të pasurit fëmijë, por theksoi se të rritësh një fëmijë është shumë më tepër se thjesht dashuria për fëmijët.
Në të njëjtën intervistë, këngëtarja konfirmoi gjithashtu fejesën me aktorin britanik Callum Turner, 35 vjeç. Ajo ndau emocionet e saj për këtë hap të rëndësishëm në marrëdhënien e tyre, duke thënë:
“Po, jemi të fejuar. Është shumë emocionuese. Jam e dashuruar me të. Është shumë për mua. Është një ndjenjë e mirë të dish që personi me të cilin do të kalosh pjesën tjetër të jetës tënde të njeh shumë mirë.”
Unaza e fejesës, sipas saj, është dizajnuar në mënyrë të personalizuar nga Turner, me ndihmën e motrës së Duas dhe shoqeve të saj më të ngushta.
Më 9 qershor, Dua Lipa publikoi disa foto në Instagram ku shihet për herë të parë me unazën e diamantit në dorë. Në një prej fotove më të komentuara, ajo shfaqet e ulur në tokë teksa Turner e përqafon dhe e puth në ballë – një moment i ëmbël që u shpërnda gjerësisht në rrjete sociale.
