Më 13 qershor, në ambientin historik të Amfiteatrit të Durrësit, u mbajt me sukses edicioni i dytë i spektaklit “Ari’s Angels Dance Show”, një ngjarje artistike që mblodhi mbi 400 spektatorë mes tyre edhe të huaj për të shijuar një mbrëmje të mbushur me ngjyra, energji dhe talent të pastër.
Nën drejtimin artistik të Ari Metani (koreograf dhe producent), dhe me mbështetjen e asistentëve Bana Kucuku dhe Liza Metani, kjo shfaqje ishte një festë e vërtetë për artin e kërcimit.
Mbi 110 fëmijë nga “Ari Metani Dance Company” performuan me pasion në zhanre të ndryshme të kërcimit, duke dëshmuar progresin dhe punën e palodhur gjatë gjithë vitit.
Publiku u mrekullua nga kostumografia e larmishme dhe një skenografi që i dha jetë çdo performance. Secili detaj tregonte përkushtimin dhe profesionalizmin që ka karakterizuar këtë projekt që në fillimet e tij.
Ky event u realizua me mbështetjen e Bashkisë Durrës, Teatrit “Aleksandër Moisiu”, Ministrisë së Ekonomisë, Kulturës dhe Inovacionit, si dhe Qendrës Muzeore Durrës një bashkëpunim që synon të promovojë artin dhe talentet e reja në skenën kulturore shqiptare.
“Ari’s Angels Dance Show” nuk ishte thjesht një shfaqje ishte një dëshmi e rritjes, përkushtimit dhe dashurisë për kërcimin. Ky edicion e konfirmoi edhe një herë se e ardhmja e artit në Shqipëri është në duar të sigurta.
