17 goditje me thikë i shkaktuan hemorragji të brendshme dhe vdekje të menjëhershme 45-vjeçares shqiptare Gentiana Kopili Hudhra, e cila u godit në një park të Tolentinos në Itali, nga ish-bashkëshorti i saj, Nikollaq Hudhra, 55 vjeç.
Autopsia e kryer sot në morgun e Maceratës ka hedhur dritë mbi dinamikën tragjike të krimit që ndodhi në Tolentino, duke konfirmuar detaje të tmerrshme të sulmit.
Sipas prokurorisë së Maceratës, e cila po heton ngjarjen për vrasje të qëllimshme dhe të paramenduar, disa nga plagët ishin sipërfaqësore, gjë që tregon se Gentiana ka tentuar të mbrohet dhe të largohet.
Ajo është përpjekur të ndalojë një goditje me dorë dhe më pas ka ikur, por është ndjekur dhe goditur nga pas në rrugën Benadduci, ku Hudhra e ka kapur dhe e ka therur me thikë kuzhine me teh 18 cm, të cilën e kishte fshehur në një qese për të mos u vënë re.
Sipas mjekut ligjor Antonio Tombolini, që ka kryer autopsinë me porosi të prokurorit Enrico Riccioni, disa nga goditjet ishin të pozicionuara në qafë, në shpinë dhe anash trupit.
Plagët fatale kanë dëmtuar organe të brendshme, duke shkaktuar humbje të madhe gjaku dhe vdekje të menjëhershme. Po ashtu, janë konstatuar edhe plagë në fytyrë, që dyshohet se janë shkaktuar nga goditje me shqelma teksa viktima ndodhej e shtrirë në tokë.
Ngjarja ndodhi rreth orës 20:00 të së shtunës më 14 qershor, kur Hudhra i zuri pritë Gentianës, e cila ndodhej me shpinë dhe fliste në telefon. Pas krimit, ai u ul në një stol pranë trupit të pajetë dhe nuk tentoi të largohej. Atje është arrestuar nga karabinierët, të cilët e shoqëruan në komisariat për t’u marrë në pyetje.
Sot, para autopsisë, u bë edhe njohja e trupit nga avokati Guglielmo De Luca, përfaqësues i familjarëve të Gentianës. Në morg ndodhej edhe avokatja e Hudhrës, Lucia Testarmata, e cila nuk mori pjesë në ekzaminim.
Nesër, më 20 qershor, në zonën sportive Sticchi të Tolentinos do të hapet dhoma mortore në tendën e përkohshme nga ora 10:00 deri në 19:00. Ceremonia e varrimit nuk do të zhvillohet në Itali, pasi trupi i Gentianës do të përcillet për në Shqipëri, ku do të bëhet edhe varrimi.
