Prej nëntë vitesh, magjia e filmit udhëton nëpër Shqipëri, duke ndalur në qytete të mëdha e të vogla, duke sjellë artin më pranë njerëzve. Sivjet, aktiviteti kombëtar “Open Cinema 2025” hyn në edicionin e tij të 9-të, më i pasur në përmbajtje, më i ndjeshëm në mesazh dhe më i freskët në risitë që sjell për publikun.
Këtë verë, udhëtimi kinematografik nis nga qyteti i Gramshit, më 10, 11 dhe 12 Korrik, ku çdo mbrëmje – nga ora 20:00 deri në mesnatë – do të shndërrohet në një përvojë unike nën dritën e yjeve dhe në shoqërinë e filmit, muzikës dhe emocioneve të paharrueshme. Nën sloganin “Kinemaja shëtitëse nëpër Shqipëri”, “Open Cinema” vazhdon të jetë ura mes brezave dhe një homazh i gjallë për trashëgiminë tonë filmike.
Mbrëmja e parë do të çelet në mënyrë madhështore me praninë e regjisorit të njohur Esat Musliu, një ikonë e kinemasë shqiptare, si dhe të aktorit të dashur për publikun ndër vite, Ndriçim Xhepa, i cili mbetet simbol i skenës dhe ekranit.
Një tjetër shtyllë e rëndësishme e këtij edicioni është muzika live, që do të performohet përpara projeksioneve nga një grup artistësh të njohur: Irma Libohova, Eranda Libohova, Maya Aliçkaj, Megi Laska, Liljana Kondakçi, si dhe vjolinistja virtuoze Aiola Leska, e cila do të sjellë kolonat zanore më të ndjera nga kinematografia shqiptare dhe ajo ndërkombëtare.
Përveç festës, ky edicion mbart edhe ndjeshmëri të veçantë, pasi do të zhvillohen homazhe për artistët që janë ndarë së fundmi nga jeta, duke lënë pas një trashëgimi të jashtëzakonshme kulturore: regjisorët Piro Milkani dhe Vladimir Prifti, aktorja e madhe Margarita Xhepa dhe ylli i madh ndërkombëtar, Alain Delon. Ata do të nderohen me kujtime filmike dhe simbolikë mirënjohjeje nga publiku dhe artistët.
Fëmijët do të kenë gjithashtu hapësirën e tyre në këtë aktivitet – animacionet shqiptare klasike dhe bashkëkohore do të projektohen në ekranin e madh, duke i ftuar të vegjlit në një botë përrallash e fantazie.
“Open Cinema 2025” zhvillohet nën kujdesin e veçantë të Kryetarit të Bashkisë së Gramshit, z. Besion Ajazi, dhe mbështetet nga Qendra Kombëtare e Kinematografisë, Arkivi Qendror Shtetëror i Filmit, Ambasada Spanjolle në Tiranë dhe Production Cinemania, e cila prej vitesh kujdeset për cilësinë dhe përmbajtjen e këtij projekti kulturor të rrallë.
Të gjitha netët do të prezantohen me finesë nga moderatorja e mirënjohur Silvana Braçe dhe gazetari i apasionuar pas artit Ermal Qori, të cilët do të udhëheqin publikun përmes emocioneve të filmit, fjalës artistike dhe momenteve përkujtimore. “Open Cinema” është më shumë se një festival – është një udhëtim emocional, artistik dhe kulturor, një shëtitje përmes kujtesës kolektive dhe një rikthim në vlerat e kinemasë që bashkojnë, edukojnë dhe frymëzojnë. Çdo vit, ai sjell surpriza të reja, duke ruajtur thelbin e dashurisë për filmin dhe duke e ndarë atë me të gjithë – nga qytetet metropolitane deri te komunitetet më të vogla, nga të rriturit te fëmijë
