Pas një karriere 20-vjeçare në Kuvendin e Shqipërisë, prej të cilave 12 vite si Drejtoreshë e Komunikimit, Manjola Zeka, ka bërë publike dorëheqjen nga detyra e saj përmes një postimi reflektues në rrjete sociale.
Në njoftimin e saj, ajo thekson se kjo vendimmarrje erdhi pas një periudhe të gjatë reflektimi personal dhe profesional. Gjatë këtyre dy dekadave, ajo ka drejtuar një nga sektorët më sfidues të institucionit, atë të komunikimit, duke transformuar Kuvendin në një institucion model për transparencë dhe bashkëpunim me median dhe qytetarët.
“Jam krenare se Kuvendi i Shqipërisë është sot nga institucionet më transparente, bashkëpunuese dhe lehtësuese për mediat, gazetarët dhe qytetarët”, shprehet ajo.
Zeka shpreh mirënjohje për të gjithë bashkëpunëtorët ndër vite, kolegët, drejtuesit e Kuvendit që nga Jozefina Topalli e deri më sot, si dhe për të gjithë ata që e kanë mbështetur në këtë rrugëtim të gjatë.
Një falënderim i veçantë i është kushtuar edhe gazetarëve dhe punonjësve të mediave:
“Sa më shumë grindeshim, aq më shumë duheshim… Faleminderit përunjësisht!”
Me ironi, ajo nuk ngurroi të përmendte edhe procesin e dorëheqjes:
“‘Falënderim i veçantë’ stafit përgjegjës të Kuvendit të Shqipërisë për firmosjen e menjëhershme të dorëheqjes. Ishte hera e parë që nuk shkelën afatet apo normat.”
Në fund, ajo i uron më të mirën kujtdo që vazhdon punën në institucion dhe kërkon ndjesë nëse gjatë këtyre viteve ka prekur dikë me fjalë apo veprime.
Kjo dorëheqje shënon fundin e një epoke për një nga figurat më të njohura të komunikimit institucional në Shqipëri.
https://www.facebook.com/share/p/19XQeSFzFC/?mibextid=wwXIfr
