Ish-kapiteni i Partizanit, Ardit Beqiri, i bashkohet stafit teknik të Alfred Deliallisit te Korabi, ku do të mbajë rolin e zëvendëstrajnerit.
Trajneri Deliallisi ka nisur me vrull përgatitjet për sezonin e ri, me objektivin e qartë për të siguruar një vend në fazën play-off dhe për të rikthyer ambicien te skuadra nga Peshkopia.
Prania e Beqirit, një emër i madh i futbollit shqiptar, pritet të sjellë eksperiencë të vyer për grupin që po ndërtohet, por edhe autoritet e qetësi.
Ish-futbollisti i kombëtares shqiptare, ishte dëshirë e trajnerit 32-vjeçar te Korabi.
Dysheja Deliallisi–Beqiri do të jetë një kombinim interesant dhe ambicioz në pankinë, që do të udhëheqë skuadrën drejt objektivave të vendosur.
Në skuadër priten afrime të rëndësishme për të rritur cilësinë, por gjithashtu nuk do të mungojnë as disa largime që nuk janë në planet e trajnerit Deliallisi.
Korabi duket i vendosur të mos jetë thjesht pjesëmarrës, por të luajë rolin e protagonistit në sezonin e ardhshëm!
