Kryeqyteti shqiptar do të presë për herë të parë një forum të posaçëm që bashkon të diplomuarit nga universitetet e Mbretërisë së Arabisë Saudite në të gjithë rajonin e Ballkanit Perëndimor. Aktiviteti treditor, që nis të hënën më 7 korrik në Tiranë, organizohet nga tre prej institucioneve më prestigjioze të arsimit të lartë në Arabinë Saudite: Universiteti Imam Muhammad bin Saud, Universiteti Umm Al-Qura dhe Universiteti Islamik i Medinës, në bashkëpunim me Ambasadën Saudite në Shqipëri dhe Ministrinë shqiptare të Arsimit dhe Sportit.
Ky forum i nivelit akademik dhe diplomatik vjen në një moment ku Arabia Saudite po zgjerohet në mënyrë të qëndrueshme në skenën ndërkombëtare, jo vetëm ekonomikisht dhe politikisht, por edhe përmes diplomacisë arsimore dhe kulturore. Takimi në Tiranë pritet të shërbejë si një platformë për të forcuar marrëdhëniet mes Mbretërisë Saudite dhe vendeve të Ballkanit, duke theksuar rolin e të diplomuarve si ura lidhëse mes kulturave dhe vlerave.
Sipas Ambasadorit të Arabisë Saudite në Shqipëri, Faisal Ghazi Ismail Hifzi, forumi synon jo vetëm të vlerësojë kontributin e ish-studentëve të universiteteve saudite, por edhe të riafirmojë angazhimin e Mbretërisë për ndërtimin e lidhjeve të qëndrueshme arsimore me partnerët ndërkombëtarë.
“Ky takim pasqyron përkushtimin e Mbretërisë për të ndërtuar ura të qëndrueshme bashkëpunimi përmes arsimit dhe kulturës. Ne jemi krenarë për të diplomuarit tanë dhe rolin e tyre në forcimin e marrëdhënieve miqësore me vendet e Ballkanit,” – u shpreh ambasadori Hifzi.
Në kuadër të ceremonisë zyrtare të hapjes, fjalë përshëndetëse do të mbajnë vetë ambasadori, si dhe rektori i Universitetit Imam Muhammad bin Saud. Më pas do të flasë Ministrja e Arsimit dhe Sportit e Shqipërisë, znj. Ogerta Manastirliu, ndërsa pjesëmarrësit do të ndjekin gjithashtu diskutime dhe aktivitete të tjera me karakter kulturor dhe akademik.
Pjesëmarrës në këtë forum do të jenë ish-studentë nga vende të ndryshme të Ballkanit, si Shqipëria, Kosova, Maqedonia e Veriut, Bosnja dhe Hercegovina, Mali i Zi dhe Serbia, të cilët kanë kryer studimet në universitetet saudite dhe sot veprojnë në fusha të ndryshme të jetës publike, arsimore dhe fetare në vendet e tyre.
Ky takim përkon me vizionin e ri të udhëheqjes saudite, e cila përmes strategjisë kombëtare “Vision 2030”, synon të modernizojë shoqërinë, të diversifikojë ekonominë dhe të zgjerojë ndikimin global të vendit përmes mjeteve jo tradicionale, siç janë arsimi, kultura dhe diplomacia njerëzore.
Për ambasadorin saudit, diplomacia arsimore është një nga mjetet më të fuqishme për të ndërtuar partneritete afatgjata dhe për të ndihmuar në përhapjen e vlerave të tolerancës, bashkëjetesës dhe përkushtimit ndaj dijes dhe komunitetit.
“Kjo iniciativë përputhet me vizionin strategjik të Mbretërisë për të ndërtuar partneritete afatgjata në rajone të ndryshme të botës, përmes dijes dhe vlerave të përbashkëta,” – deklaroi Hifzi në përmbyllje të fjalës së tij.
Forumi vjen gjithashtu si shprehje e interesit të përbashkët midis Arabisë Saudite dhe Shqipërisë për të thelluar bashkëpunimin kulturor dhe arsimor. Në këtë kuadër, ambasadori Hifzi vlerësoi bashkëpunimin me Ministrinë e Arsimit dhe Sportit të Shqipërisë, si dhe përpjekjet e universiteteve saudite për të krijuar këtë hapësirë dialogu dhe reflektimi.
Aktiviteti pritet të shërbejë si model për iniciativa të tjera të ngjashme në rajon dhe për të konsoliduar një rrjet të diplomuarish që do të kontribuojnë në forcimin e marrëdhënieve mes Arabisë Saudite dhe Evropës Juglindore.
