Nga Ermal Qori
Ëndrra për një karrige e kundërshtarëve ngre Arlind Qorin në fronin e opozitës së re në Shqipëri.
11 maji 2025: gara solli në fushën politike shumë skuadra të reja, disa të vjetra që pretendonin se ishin të reja, dhe disa të reja në emër, por me zakone të vjetra.
Në këtë panoramë ra në sy Arlind Qori dhe Lëvizja Bashkë. Aspak për ndonjë strategji të sofistikuar marketingu, dhe jo për ndonjë mbështetje masive në sheshe që të bënte të ndryshoje mendim — qoftë edhe emocionalisht, për momentin…
Por për faktin e thjeshtë e të rrallë në politikën shqiptare: Qori nuk ra në grackën e zakonshme të premtimeve boshe. Ai nuk tha një gjë sot dhe një tjetër nesër. Ishte i qartë në synimin e tij për të hyrë në skenën politike dhe përzgjodhi me vetëdije një target-grup të caktuar (pa përjashtuar askënd, por duke synuar objektivin), për të cilin luftoi fort. Kujtojmë se votuesit e tij mbetën të bindur dhe nuk e braktisën.
Kur të gjithë shtrinë dorën e bashkëpunimit, ai refuzoi. Tha se bashkimi me partitë e tjera do të ishte tradhti ndaj aktivistëve të tij, votuesve dhe vetes. Nuk besonte asnjërën prej këtyre forcave, sepse sipas tij-ato nuk përfaqësonin idealet që ai mbronte. Këtu u theksua edhe më tepër karakteri politik: jo pazare, jo KÇK (kap çfarë të kapësh).
Siç kishte premtuar, Qori nuk vendosi veten në vend të parë në listë dhe e zhvilloi fushatën në emër të skuadrës, jo të individit.
Rezultati ishte njëkohësisht i pritshëm dhe befasues. Në një intervistë që zhvillova me të, e pyeta se sa mandate priste të fitonte. Nuk mora përgjigje. Në fakt, ai nuk ra në grackën e delirit (ndryshe nga ç’deklarata synoja të merrja unë, për hir të sensacionit mediatik).
Dhe kështu ndodhi. Arlind Qori analizoi, reagoi dhe refuzoi të bëhej pjesë e një bashkimi me parti të tjera, duke mbetur besnik ndaj ideologjisë së tij.
Me zhvillimet e fundit, Qori ka konfirmuar parashikimet që kishte bërë muaj më parë. Kur të gjithë ëndërrojnë për një karrige, Arlind Qori po përpiqet t’i bindë qytetarët se një karrige mund të kthehet në ëndërr e shpresë për ta… Edhe këtu, ai prapë bëri atë që tha dhe nuk kërkoi të hynte vetë në parlament.
Por sa e ngjit kjo analizë tashmë e realizuar (fatkeqësisht për partitë e tjera të reja) më lart pozicionin e tij në politikë?
Sa është thyer besimi i qytetarëve te partitë e tjera dhe si po shfaqet Qori në publik?
Kriza e opozitës së vjetër, që vijon të mbetet jashtë pushtetit prej 13 vitesh, me figura të konsumuara dhe me parti të reja që duket se po e zhgënjejnë publikun, po e shndërron Arlind Qorin në mishërimin e shprehjes “A star is born”?
Teksa të gjithë janë të zënë me diçka, Lëvizja Bashkë po përpiqet të arrijë lartësinë e duhur për t’u përballur me ‘gjigandin politik’ që gjendet në selinë rozë…A është ky momenti?
