Presidentja e Kosovës, Vjosa Osmani, njoftoi të martën se ka tërhequr zyrtarisht kërkesën e saj drejtuar Gjykatës Kushtetuese, lidhur me çështjen e konstituimit të Kuvendit të Kosovës. Vendimi, sipas saj, është marrë si kundërpërgjigje ndaj caktimit të gjyqtarit Radomir Laban si raportues i kësaj lënde.
“Sot kam tërhequr kërkesën e paraqitur më 22 korrik 2025, në përputhje me Ligjin për Gjykatën Kushtetuese dhe Rregulloren përkatëse. Vendimi erdhi pas konfirmimit se Radomir Laban është caktuar gjyqtar raportues – një person për të cilin institucionet tona të sigurisë kanë dhënë informacione zyrtare mbi veprimtari të rrezikshme në vitet 2018, 2021 dhe 2024,” deklaroi Osmani në një konferencë për media.
Ajo theksoi se përfshirja e Labanit në një rast të tillë përbën rrezik për sigurinë kombëtare dhe është në kundërshtim me rendin kushtetues të Republikës së Kosovës.
Kush është Radomir Laban?
Radomir Laban është anëtar aktual i Gjykatës Kushtetuese të Kosovës, i propozuar nga Lista Serbe dhe emëruar nga ish-presidenti Hashim Thaçi në gusht 2018. Në të njëjtin vit, Thaçi kishte shtyrë dekretimin e tij, duke kërkuar verifikime shtesë nga organet e drejtësisë.
Në vitin 2011, një gjykatë serbe e shpalli Labanin fajtor për marrje ryshfeti dhe e dënoi me gjashtë vjet burg. Serbia më vonë kërkoi arrestimin e tij përmes EULEX-it, por misioni nuk mori masa, duke pretenduar se nuk kishte mandat për një arrestim të tillë.
Mandati i Labanit në Kushtetuese është nëntëvjeçar. Osmani paralajmëroi se caktimi i tij në këtë çështje delikate përbën kërcënim serioz për integritetin institucional dhe për procesin kushtetues të vendit.
