Ligji flet qartë: për t’u bërë zv/drejtor i përgjithshëm duhet të kesh shërbyer jo më pak se 7 vite në struktura sigurie ose drejtësi (neni 20, pika b). Për t’u bërë drejtor i nivelit të mesëm duhet të kesh 10 vite eksperiencë në polici gjyqësore/administratë dhe 3 vitet e fundit në pozicione drejtuese (neni 54, pika iii).
Po çfarë përvoje na sjell z. Artjol Saliasi?
• Specialist në IKMT – pra, me fadromat dhe lejet e ndërtimit.
• Specialist në Tatime – me deklarata fiskale, jo me policë gjyqësore.
• Operator kompjuteri në lloto sportive – ku eksperienca kryesore është shtypja e bileteve dhe printimi i kuponit.
Në vend të 7 viteve në siguri, kemi 7 vite lëvizje zyrash.
Në vend të 10 viteve në polici gjyqësore, kemi 10 gishta mbi tastierë.
Në çdo institucion normal, hapet konkursi, shpallen kriteret dhe punonjësit me karrierë garojnë për ngritje në detyrë. Në AMP, nën drejtimin e Artjol Saliasit, ndodh e kundërta: konkursi mbyllet, qokat hapen.
Punonjësit aktualë, që kanë kaluar testime, vetting e trajnim, mbahen jashtë loje, duke u orientuar të mos konkurrojnë për ngritje në detyrë. Pse? Sepse drejtori i përgjithshëm ka mision të qartë: të bëjë qokën për disa emra dhe konkretisht: Ervin Hasrama dhe Besmir Qibini, deri dje pjesë e Policisë së Shtetit, sot projektohen të katapultohen në AMP – edhe pse, ironikisht, kanë qenë më parë subjekte të vetë kësaj agjencie.
Pra, ata që duhet të ishin nën kontroll, tani bëhen kontrollorë. Një formulë e re karriere: nga i hetuar, në hetues; nga subjekt, në drejtues. Ndërkohë, punonjësit e ndershëm të AMP-së, që kanë vite në sistem, shohin nga korridoret sesi vendet e tyre rezervohen për njerëz pa kontribute në AMP.
Këto praktika nuk janë thjesht lojë me emra, por minojnë vetë misionin e AMP-së. Një agjenci që duhet të mbikëqyrë policinë, rrezikon të shndërrohet në vegël të korruptuar dhe të pabesueshme, pa autoritet dhe pa rezultate. Çdo prurje e tillë nga policia, që kalon nga “subjekt” në “kontrollor”, sjell vetëm dekonspirim, konflikt interesi dhe humbje besimi nga qytetarët.
Sfida mbetet e hapur: nëse Artjol Saliasi i plotëson kriteret ligjore të nenit 20 dhe 54, le t’i bëjë publike detyrat konkrete dhe eksperiencën që e çuan nga lloto sportive në zëvendësdrejtor të përgjithshëm të AMP-së. Deri atëherë, CV-ja e tij nuk është shembull karriere, por një sfidë e hapur ndaj ligjit dhe një rrezik i drejtpërdrejtë për të ardhmen e Agjencisë.-NEWSZONE.AL
