Pushimet e gushtit u mbyllën për kabinetin Rama, por kryeministri vijon të mbajë ende të njëjtin ekip ministror. Ndryshimi i vetëm, tani për tani, ka të bëjë me formatin e zhvillimit të mbledhjes së këshillit të ministrave.
Pas takimit të parë të sezonit të ri politik, numri dy i ekzekutivit, Belinda Balluku tregoi cilat do të jenë risitë, pas analizës së zhvilluar korrikun e kaluar në Tepelenë.
“Do jenë edhe zëvendës ministrat, që janë përgjegjës për dikasterin që ata mbulojnë”, tha Balluku.
Vjeshta do të sjellë zhvillime në çdo dikaster, pasi me vendim qeverie këto ministri do të kenë edhe ndihmën e shtuar të teknologjisë. Inovacioni do të shoqërohet edhe me shtim të numrit të administratës, por ndryshe nga pjesa tjetër, pagat e tyre do të jenë më të larta.
“Nga ky shtator do krjohen nuklat e inovacionit, ka qenë kërkesë e Kryeministrit për shkak të zhvillimeve inovative, dike nisur nga dixhitalizmi i të gjitha shërbimeve që qytetarët e kane tashmë këtë dixhitalizim. Duhet përmendur se tashmë Shqipëria operon me teknologji moderne siç është rasti i satelitëve. Sot ne kemi rezultate të prekshme dhe po përdoren për arsye mjaft të mira.
Nuklat do t’i propozojnë ministrit, trupës, projekte të reja, inovatore. Për të pasur nukla efikase do na duhet të dalin në tregun shqiptar për të përthithur njerëz që kanë pasion inovacionin.
Kemi vendosur që ata të paguhen me paga më të larta se sa sektorët e tjerë. Në ditët në vazhdim pasi të konsolidohet e gjitha kjo ide e re, do kemi mundësi që brenda Vjeshtës këto nukla t’i kemi të disponueshme para secilës ministri.
Sot kemi diskutuar gjithashtu edhe për një vendqëndrim të përbashkët për një vendqëndrim të përbashkët të këtyre nuklave”, përfundoi ministrja.
