Një 80-vjeçare gjeti vdekjen mëngjesin e sotëm, pasi banesa e saj u përfshi nga flakët. Violeta Muçi ishte vetëm në shtëpi, kur zjarri ra në banesë dhe për rrjedhojë ajo vdiq si pasojë e asfiksisë. Shkak i zjarrit dyshohet të ketë qenë një shkëndijë elektrike. Sipas familjarëve, Muçi po bëhej gati të dilte për pazar. Ajo ka qenë duke mbyllur grilat e shtëpisë, por nuk ka mundur dot të dalë
E vetmja dhomë që ka mundur t’i mbijetojë zjarrit është ajo e 80-vjeçares. Gazetarja Ledina Jakimi ka mundur të sigurojë dëshminë e vajzës së 80-vjeçares.
E bija me lot në sy tregon se u largua si çdo mëngjes për në punë, bashkë me bashkëshortin dhe fëmijët. Por kur erdhi në shtëpi, e ëma kishte ndërruar jetë. Ajo tregon se pak muaj më parë kishte humbur edhe të atin si pasojë e asfiksisë. Një apel e kishte edhe për qytetarët, që të ndihmojnë pasi kanë mbetur në qiell të hapur. E gjithë shtëpia është shkrumbuar dhe tashmë është e pabanueshme.
Dhëndri i 80-vjeçares, Bledar Lekaj tregon se kanë qenë fqinjët ata që i kanë njoftuar për zjarrin dhe kanë njoftuar edhe forcat zjarrfikëse. Lekaj thotë se 80-vjeçarja ka qenë duke mbyllur grilat për të dalë, ndërsa forcat zjarrfikëse e kanë gjetur në banjo.
