Kryetarja e Kuvendit, znj. Lindita Nikolla, i është përgjigjur sot me një letër deputetit, z. Petrit Vasili, në lidhje me pretendimet për bllokimin nga ana e Kryetares së Kuvendit të shqyrtimit të projektligjeve të propozuara nga deputetët e opozitës.
“Në ushtrimin e funksionit dhe detyrave si Kryetare e Kuvendit të Shqipërisë udhëhiqem nga Kushtetuta, ligjet e Republikës si edhe Rregullorja e Kuvendit, duke vendosur mbi të gjitha interesin publik dhe të drejtat e qytetarëve.
Ju bëj me dije se të gjitha projekt-aktet ligjore të propozuara si nisma të deputetëve dhe të cilat Ju përmendni në letrën Tuaj, janë përfshirë në Programin 9-javor dhe Kalendarin 3-javor të punimeve të Kuvendit, pas miratimit me mirëkuptim në mbledhjen e Konferencës së Kryetarëve në datën 02.09.2022. Në vijim këto projektligje u kanë kaluar komisioneve përgjegjëse dhe komisioneve për dhënie mendimi.
Në lidhje me vijueshmërinë e shqyrtimit dhe përshirjes në kalendarin e veprimtarisë së komisioneve të projektligjeve, në bazë të Rregullores, kjo është një kompetencë e kryesive të komisioneve dhe jo e Kryetares së Kuvendit.
Përsa u përket interpretimeve politike në letrën Tuaj nuk po bëj komente, sepse interpretimet partiake e politike janë jashtë statusit dhe funksionit tim si Kryetare e Kuvendit e Republikës së Shqipërisë.”, shkruan midis të tjerash në përgjigjen e saj, Kryetarja e Kuvendit, znj. Lindita Nikolla.
