Kryebashkiaku i Kavajës Fisnik Qosja në një intervistë për “Mirëmëngjesi Shqipëri”, ka deklaruar se do të bashkëpunonte me Kryeministrin Edi Rama për të mirën e qytetit.
Ai u shpreh se do të bashkëpunonte me këdo nga krahu tjetër politik, nëse do të ishte në favor të Kavajës.
“Fisnik Qosja bashkëpunon me kryeministrin dhe me cilindo që i bën mirë Kavajës. Nëse një njeri nga qeveria dhe një gur të sjellë për Kavajën, nuk kam kundërshtim. Me kryebashkiakun e Tiranës për Kavajën nuk kemi ndonjë bashkëpunim, por pse jo edhe me të. Me kryeministrin marrëdhënia ka qenë pozitive”, u shpreh ai.
Qosja ishte i bindur në fitoren e zgjedhjeve vendore, kjo pasi sikurse theksoi ai, “e njihte mirë terrenin”. Më tej ai premtoi transformim të Kavajës, nga qendra në periferi.
“Gara është e vështirë. Duke qenë njeri që e njoh shumë mirë terrenin, isha i bindur që fitorja ishte e padiskutueshme. Makineria e pushtetit bëri të pamundurën, jashtë limiteve, por qytetarët e Kavajës nuk tremben. Ishim të qetë.
Qytetarët panë një njeri si ata. Unë jam një njeri si ata dhe do e drejtoj bashkinë me qytetari. Do kemi transformim të qytetit, nga qendra në periferi.
Aktualisht po merremi me një super park. Do e bëjmë Kavajën atraksion turistik në çdo periudhë të vitit. Gjatë kësaj periudhe rreth 4 muaj e pak në krye të bashkisë, jam krenar sepse kam bërë 5 projekte të cilat do i vihen në dispozicion buxhetimit të ri të 2024”, shtoi Qosja.
Kryebashkiaku theksoi se memoria e qytetit është shumë e rëndësishme. Në këtë kuadër, Qosja u shpreh se Kavaja është qyteti më i mirë për të jetuar dhe vizituar.
“Memoria e qytetit është shumë e rëndësishme. Është qytet me vlera, Kavaja. Kavajën e ka bekuar zoti me një klimë të jashtëzakonshme, kemi njerëz mikpritës, ushqime tradicionale, kemi njerëz të mrekullueshëm, shtëpia pushimi, afër Tiranës jemi. Besoj Kavaja është qyteti më i mirë për të jetuar dhe për të vizituar, ndikimi i bashkisë do të jetë maksimal”, përfundoi ai.
