Inflacioni i lartë prej rreth 2 vitesh, ka ulur konsumin e qytetarëve, ndërsa nga ana tjetër pritet të ngadalësohen edhe investimet e huaja për shkak të rritjes së normës bazë të interesit nga Banka e Shqipërisë.
Këto evidentohen si shkaqet kryesore që do të ngadalësojnë ekonominë e vendit këtë vit dhe në 2024, sipas raportit të Komisionit Evropian, ku pritet që rritja ekonomike këtë vit të jetë 3.5% dhe në vitin e ardhshëm të ulet në 3.1%.
“Rritja pritet të ngadalësohet nga 4.8% në 2022 në 3.5% në 2023, duke reflektuar efektet bazë dhe ngadalësimin e konsumit privat prej çmimeve ende të larta të ushqimeve, edhe pse ajo vazhdon të përfitojë nga rritja e punësimit dhe rritja e pagave reale” thuhet në raport.
Ulja e inflacionit, stabilizimi i tregjeve të huaja, rritja e konsumit, investimeve dhe eksporteve pritet të përshpejtojnë rritjen ekonomike në vitin 2025, të planifikuar nga KE në 3.7%. Në raport janë prekur edhe rreziqe të tjera me të cilat mund të përballet vendi përveç inflacionit, ku veçohen ndryshimet klimatike dhe mungesa e fuqisë punëtore të kualifikuar, e rënduar më shumë nga emigracioni dhe ulja e lindshmërisë.
Ngadalësimi i ritmit të uljes së inflacionit, mund të sjellë edhe rritje të tjera të normës bazë të interesit nga Banka e Shqipërisë me qëllim forcimin e lekut, në mënyrë që të balancohet kërkesa për mallra me ofertën që ka tregu.
Por ky shtrëngim po ul investimet, dhe nga ana tjetër po zhvlerëson euron duke ndikuar negativisht tek eksportet, pohohet në raport. Edhe borxhi publik pritet të ngadalësojë ritmin e rënies së tij. Por nga ana tjetër vlerësohet pozitive ecuria e sektorit të turizmit, që pritet të vijojë edhe në vitet e tjera.
