Paundi britanik ka rënë në një nivel rekord kundrejt dollarit amerikan të hënën, si pasojë e frikës në rritje për stabilitetin e financave të qeverisë së Mbretërisë së Bashkuar.
Rënia prej gati 5% të hënën duke shkuar në 1.03 $, çoi në parashikimet se paundi mund të barazohet me dollarin amerikan.
Paundi ra pak nën 1,035 dollarë, më i ulëti që ka qenë që kur monedha britanike kaloi në njësi dhjetore në vitin 1971, ndërsa tregjet aziatike u hapën të hënën në mëngjes.
Pas kësaj monedha u rikuperua lehtë duke u tregtuar në mbi 1.067 dollarë.
Monedha britanike gjithashtu ra me më shumë se 3.7% kundrejt euros, duke rënë nën 1.08 € përpara se të rikuperohej në 1.10 €.
Pasi arriti nivelin më të lartë të 20 viteve muajin e kaluar, dollari amerikan ka vazhduar gjithashtu të forcohet me Indeksin e Dollarit, i cili mat monedhën amerikane kundrejt gjashtë monedhave të tjera kryesore, duke u rritur me 4.64% në 30 ditët e fundit.
Rënia e monedhës vjen pas njoftimit të Kancelarit Britanik të Thesarit, Kwasi Kwarteng të premten se “Mbretëria e Bashkuar do të bënte shkurtimet më të mëdha të taksave në 50 vjet, në të njëjtën kohë me rritjen e huamarrjes dhe shpenzimeve të qeverisë përballë inflacionit të lartë”.
Masat e reja fiskale për uljen e taksave, të cilat përfshijnë heqjen e planeve për një rritje të taksës së korporatave dhe uljen e normës më të lartë të tatimit mbi të ardhurat, janë kritikuar si “ekonomi të ulët” nga Partia Laburiste e opozitës dhe madje janë kritikuar nga anëtarët e Partisë Konservatore.
