Një person që dyshohet të jetë larguar jashtë vendit i ka dhënë 150 mijë euro vëllezërve Beqiraj që të kryenin ekzekutimin e Arben Mërkurit, i njohur ndryshe si ‘Maneci’. Gentian dhe Indrit Beqiraj që kanë zbërthyer ngjarje të rënda kriminale kanë deklaruar se komunikimin për pagesën e bënë me Kevin Zenelin përmes aplikacionit ‘Signal’.
Porositësit që kërkonte ‘kokën’ e Manecit i kishin vendosur nofkën ‘katunari’. Dyshohet se Arben Maneci kishte vrarë një person të afërt të ‘katunarit’ ndaj donte të hakmerrej.
“Personi i interesuar komunikonte me aplikacionin SIGNAL me Kevin dhe nga e folura i patëm vendosur pseudonimin “Katunari”. Ai dyshohej se ishte i zonës pasi kishte dhe një person që na informonte në zonë për lëvizjet e Benit. Me sa kam dijeni ky person është larguar jashtë vendit. Nuk e di se ku është personi që porositi këtë vrasje dhe sipas Kevit, Arbeni dyshohej për vrasje të një të afërmit të këtij personi”, mësohet të kenë deklaruar vëllezërit Beqiraj.
Kasandro Noga mund të ketë porositur vrasjen e Manecit duke ditur se ka patur lidhje të ngushta me Beqiraj për vrasjen e Geron Hysenbelliut. Për këtë të fundit është e konfirmuar sipas dëshmive të vëllezërve se ai ka qenë porositësi, por hetuesit nuk kanë arritur ende të sqarojnë se kush ishte personi që i porositi për vrasjen e Manecit, pavarësisht se dyshimet të çojnë drejt Nogës.
Në dosje thuhet se Indrit Beqiraj deklaron me vetëpergjëgjesi dhe faktin që vetë ai në bashkepunim me Gentian Beqirajn, Ilirjan Feçin, Kevin Zenelin, i njohur edhe si Suçi, duke bashkëpunuar me njëri-tjetrin, të nxitur kundrejt pagesës nga Kasandër Noga, e më pas edhe nga Flamur Bejko, kanë dashur të vrasin me armë zjarri Geron Hasanbelliun dhe Arben Mërkurin.
Kush është Arben Mërkuri
Arben Mërkuri, 48-vjeçari u ekzekutua të mërkurën e 18 majit në Sukth. Tre autorë që lëviznin me makinë qëlluan me breshëri plumbash në drejtim të tij sapo zbriti nga makina. Shoferi qëlloi drejt 48-vjeçarit dhe një tjetër e mbajti në vëzhgim prej kohësh, duke pritur momentin “ideal” për ta ekzekutuar. Dy prej tyre janë filmuar nga kamerat e sigurisë, me maska të zeza, çfarë e bën të vështirë identifikimin. Mërkuri tentoi t’u shpëtonte plumbave duke u futur në ambientet e dyqanit. Kjo nuk e ndihmoi pasi njëri prej autorëve e ndoqi duke e plagosur rëndë. 12 gëzhoja automatiku u gjetën në vendin e ngjarjes. Arben Mërkuri vdiq në spital si pasojë e plagëve të rënda.
