Raporti i OECD mbi konkurrueshmërinë për Ballkanin Perëndimor 2024, gjetjet e së cilit theksuan përparimin e Shqipërisë në disa fusha si: Politikat e anti-korrupsionit, punësimit, turizmit, tregtisë, bujqësisë, edukimit dhe digjitalizimit, energjisë dhe aksesit në financë, është një pasqyrë e progresit të realizuar nga vendi jonë, deklaroi Ministri i Ekonomisë, Kulturës dhe Inovacionit, Z. Blendi Gonxhja.
“Gjetjet janë matur nga një barometër prej 15 dimensionesh kryesor, të përbërë nga 440 treguesish cilësor e sasior, që skanojnë në rreze X ekonominë tonë. Raporti pasqyron përmirësime në 14 nga 15 fusha dimensionet krahasuar me raportin paraardhës të tre viteve më parë, dhe e pozicionon vendin tonë lider në rajon në 8 nga 15 dimensionet kryesore”, u shpreh ministri Gonxhja.
Në konferencën për gjetjet e raportit, mbajtur në Tiranë, ku të pranishëm ishin Marzena Kisielewska, kryetare e Divizionit për Evropën Juglindore në OECD dhe Silvio Gonzato, ambasadori i Bashkimit Europian në Shqipëri, u diskutua edhe mbi hapat që duhet të ndërmerren për përmirësimin e mëtejshëm në fushat e tjera, ku BE dhe OECD garantuan mbështetjen e tyre të plotë.
“Qeveria Shqiptare është e angazhuar të ndjekë dhe zbatojë rekomandimet e raportit, duke synuar një ekonomi të qëndrueshme dhe konkurruese, të orientuar drejt tranzicionit të gjelbër dhe dixhital, me politika të përfshirjes sociale dhe punësimit që sigurojnë integrimin dinjitoz të Shqipërisë në BE. Integrimi Evropian është prioritet i rëndësishëm për Qeverinë Shqiptare dhe Ministria e Ekonomisë, Kulturës dhe Inovacionit ka një peshë të konsiderueshme në ndjekjen e kapitujve dhe zbatimin e detyrave për përafrimin e legjislacionit me Acquis të BE-së si edhe në zbatimin e detyrave për hartimin e politikave përafruese me ato të vendeve të BE-së. Qeveria Shqiptare, ka në fokus kryesor përmirësimin e klimës së favorshme ndaj biznesit dhe nxitjen për rritjen ekonomike, nëpërmjet reformave për shtetin e së drejtës dhe të transformimit dhe ristrukturimit të ekonomisë, me burime kryesore të rritjes në kapitalin human, produktivitetin përmes specializimit dhe modernizimit, tërheqjen dhe transparencën e investimeve, në përputhje me praktikat e BE-së, përmirësimin e qeverisjes së shoqërive në pronësi shtetërore dhe Ndihmës Shtetërore, nxitjen e eksporteve, internacionalizimit dhe integrimit të tregjeve sektoriale”, deklaroi Ministri i Ekonomisë, Kulturës dhe Inovacionit, Blendi Gonxhja.
Kryetarja e Divizionit për Evropën Juglindore në OECD, Marzena Kisielewska, nënvizoi se Shqipëria ka pasur përparim të jashtëzakonshëm nga raporti i fundit i realizuar në vitin 2021.
“OECD ka pasur privilegjin të mbështesë konkurrencën e përgjithshme dhe rritjen ekonomike të Ballkanit Perëndimor. Nënvizoj përparimin e jashtëzakonshëm që ka bërë Shqipëria që nga vlerësimi i fundit në 2021. Shqipëria, në fakt, ka rritur pikët e saj në 14 nga 15 dimensionet e politikave të vlerësuara në këtë botim dhe tani e kalon mesataren e Ballkanit Perëndimor në 13 nga këto dimensione. Edicioni i vitit 2024 i Perspektivës së Konkurrueshmërisë së Ballkanit Perëndimor synon të mbështesë saktësisht politikëbërësit në këtë përpjekje. Duke pasur parasysh Planin e ri të Rritjes së BE-së për Ballkanin Perëndimor, raporti paraqet një moment në kohë që qeveria shqiptare të identifikojë pengesat kryesore që pengojnë konvergjencën më të shpejtë ekonomike. Ai ofron një axhendë reformash largpamëse, duke u mbështetur në pasurinë e standardeve dhe praktikave më të mira nga OECD dhe vendet anëtare të BE-së. Profili i Ekonomisë së Shqipërisë ofron 80 rekomandime të zbatueshme në 15 fusha politikash për të udhëhequr përpjekjet tuaja”, u shpreh kryetarja e Divizionit për Evropën Juglindore në OECD, Marzena Kisielewska.
Ambasadori i Bashkimit Evropian Silvio Gonzato u shpreh se Bashkimi Evropian do të vazhdojë të mbështesë vendin në përpjekjet e tij për reforma dhe rritje të qëndrueshme.
“Perspektiva e Konkurrueshmërisë nënvizon qartë se ka shumë potencial të pashfrytëzuar për bashkëpunim rajonal në të gjithë Ballkanin Perëndimor. Plani i Rritjes së BE-së synon të ofrojë stimuj të rinj në këtë fushë. Forcimi i qeverisjes së mirë dhe sundimit të ligjit është thelbësor për rritjen ekonomike të Shqipërisë. Është premtuese që sipas këtij plani Shqipëria angazhohet të krijojë një kuadër investimi më transparent. Bashkimi Evropian do të vazhdojë të mbështesë vendin në përpjekjet e tij për reforma dhe rritje të qëndrueshme”, tha Ambasadori i Bashkimit Europian Silvio Gonzato.
