Policia e Tiranës ka reaguar, në lidhje me një ngjarje të ndodhur disa ditë më parë në kryeqytet. Efektivët e Tiranës kanë identifikuan gruan, që ka marrë për dore një vajzë të vogël nga një market, ka dalë jashtë dhe është kthyer sërish.
Në njoftim, thuhet se 57-vjeçarja Rovena Baxhia dyshohet se vuan nga probleme të shëndetit mendor. Ndaj saj ka nisur hetimi për veprën penale “Heqja e paligjshme e lirisë”, mbetur në tentativë.
Njoftimi i policisë:
Në vijim të njoftimit të dhënë më datë 15.09.2024, i cili bën fjalë për një ngjarje të ndodhur në Rrugën e Barrikadave, ku brenda një marketi një shtetase ka marrë në krahë një të mitur 2-vjeçe, ka dalë nga marketi dhe më pas është rikthyer sërish, ju njoftojmë se:
Shërbimet e Komisariatit të Policisë Nr. 3 kanë identifikuar dhe shoqëruar në ambientet e Policisë shtetasen R. B., 57 vjeçe, banuese në Tiranë, e cila dyshohet se vuan nga probleme të shëndetit mendor.
Në vijim të veprimeve u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë dhe nisi procedimi penal në gjendje të lirë për 57-vjeçaren, për veprën penale “Heqja e paligjshme e lirisë”, mbetur në tentativë, parashikuar nga neni 110/22 i Kodit Penal.
Materialet i kaluan Prokurorisë.
